"Техника ужаз ке, уж шеде"

Данил агай (гуртазы сое Данис шуо) егит дырысеныз гурт удысын тырше ни. «Дасэтӥ классэз йылпумъям бере, комбайнёрлэн юрттӥсез луыса ужаны кутски. Собере Вуж Балтачын дышетски. Арми улонэз но адӟи. Службае Чита улосвылын артиллерийской войскоосын ортчиз», - вакчияк асэныз тодматыса вераз Данил Бадрисламович. Озьы со 1982-тӥ арысен вордӥськем палъёсаз тырше. Егит ужасьлы нырысь Т-40 трактор оскиллям, Т-150-эн но ужаны кылдэм. Нош берлось дас арзэ Данил агай МТЗ трактореныз уг люкиськылы. «Гужем турын прессовать кари, тулыс культивациын луи», - вера со. Со сяна, Данил Бадрисламович ферма котырысь ужъёсты быдэсъяны но дыр шедьтэ. «Сӥзьыл кыед кисьтасько, миксер бергатӥсько но мукет чыры-пыры ужъёсты быдэсъясько, - вера со. – Техника ужаз ке, уж шеде».

Толалтэ Данил агай корт валзэ эмъян борды басьтӥське. Тулыс бусы ужъёсы, пе, дасяно. «Азьло тракторъёсты ёросысь РТП-ын ремонт каро вал. Али запчасть ваё но асьмеос гаражын тупатъяськом», - вера тракторист.

Тыршись, ӟеч сюлэмо адямилэн ваньмыз умой луэ, шуо. Озьы ик вань, дыр. Туэ гурт удысын тыршисьёслы сӥзем ёрос ужрадын Данил Бадрисламович БР-ысь Гурт хозяйствоя министерстволэн Данъян грамотаеныз пусъемын.

Марина НИКОЛАЕВА.