Кызьы азинске гурт удыс?

«Туэ гурт удысэз азинтон понна 5,8 млрд манет висъямын, - вераз Радий Хабиров гуртын тыршисьёсты данъянлы сӥзем ужрадын. - Хозяйствоослы выль техника басьтыны сётӥськись субсидиослэн быдӟалазы будоз. Ар кутсконысен 1400 выль техника басьтэмын. Шумпотоно, соос Башкортостанын поттэмын шуыса». Радий Хабировлэн кылъёсызъя, республикаысь гурт удысэз азинтон понна, отын ужасьёсты дасян сярысь сюлмаськоно, туала амалъёсын ужаны дышетсконо. Гуртын выль уж интыос кылдытоно, калыклэсь доходзэ будэтоно, соослэсь ужзэс, улонзэс капчиятыны тыршоно. Тӧролэсь ужзэ быдэсъясь Зауральее вуылыкуз, гурт калыкен пумиськылэмез сярысь но вераз. «Азьланяз асьмелы макем бадӟым уж быдэстоно, - шуиз со. – Туннэ егитъёс мукет регионъёсы ужаны ветло, тросаз гуртъёсы ву, газ кыскемын ӧвӧл на. Адямиос улон юртъёслы кулэясько. Соин азьланяз гуртъёсы сюресъёс, улон юртъёс, ФАП-ъёс, спорткомплексъёс ӝутомы. Соос егитъёсты бордазы кыскыны мед быгатозы. Та ужпумъёсты быдэстыны «Устойчивое развитие села» программаен пайдаяськомы, федерал ресурсъёсты, инвесторъёсты уже кыскомы».

Гуртын тыршисьёсты ӟечкыласа, Радий Хабиров шуиз: «Тӥ асьтэос гинэ тодӥськоды, кыӵе секыт со зорен но, кезьытэн но гурт удысэз азинтон понна уждуре вамыштон. Бадӟым тазалык тӥледлы!»

Гурт удысын но перерабатывающей промышленностьын ужасьёслэн нуналзылы сӥзем торжественной ужрадын Татышлы ёрос «За достижение высоких показателей в производстве сельскохозяйственной продукции» номинациысь дипломен пусъемын. Нош «Агро-Танып» СПК-лы «За высокие достижения в сельскохозяйственном производстве» номинациысь диплом сётэмын (кивалтӥсез Сергей Ханов).

Ужрадын нимысьтыз ужасьёсты но данъязы. «Агро-Танып» СПК-ысь механизаторлэн Владимир Муратшинлэн ужез Башкортостан Республикалэн Данъян грамотаеныз дунъямын.

Дасямын интернетысь материалъёсъя.

Туспуктэм вылын: БР-ысь Правительстволэн Премьер-министрез Р. Марданов «Агро-Танып» СПК-лэсь кивалтӥсьсэ С. Хановез данъя.