Ю тысь октон дыр азинске

Республикаысьтымы гурт хозяйствоосын ӟырдыт дыр – ю тысь октон азинске.

Башкортостанысь Гурт хозяйствоя министерстволэн ивортэмезъя, шутэтскон нуналъёсы куазь шундыё улэмен, хозяйствоос трос уж быдэстӥзы: та нуналэ шаерамы ӝыны миллион тонна ю тысь октэмын (лыдпус 13-тӥ гудырикошконэ басьтэмын). Ю тысьлэн удалтонлыкез гектарысьтыз 21,5 центнерлы ӵоша. Удмурт хозяйствоос но ю тысь октыны потӥзы.

Татышлы ёросысь «Рассвет» СПК-ысь ю-нянь дасясьёсын Танып-Чишма бусыын пумиським. Комбайнёръёс Руслан Каюмов, Алик Мухаяров, Арсений Зиянгиров, Александр Шайсламов, Алик Гузаиров арало-кутсало вал. Валтӥсь агрономлэн Андрей Шайхуллинлэн верамезъя, туэ рассветъёс 250 гектар музъеме ӟег кизилям.

- Ӟег (житница) 77 гектарын октэмын, солэн удалтонлыкез гектарысьтыз 26 центнер усе, - бусы ужъёслэн азинскеменызы тодматыса вера А. Шайхуллин. – Водительёс Вячеслав Зиянгиров, Олег Зидыганов, Юрий Шайдуллин но Ефим Гильфанов ю тысез дыраз амбаре вуттон сярысь сюлмасько. Улысь Балтачын кык ю тысь возён амбар. Отын Рудольф Шайсламов, Геннадий Гарифьянов, Ранис Габоков, Эвелина Габокова, Лиана Шарафисламова, Оксана Ушиярова, Индира Шайсламова ужало, нош Кызыл-Ярысь амбарын – Рашит Алетдинов, Денис Садыков, Артём Шаймиев. Ӟег куроез прессэ биниськом, та ужез Данил Нурисламов но Сергей Хайдаров быдэсъяло.

Ю тысь октон сяна, «Рассветын» силос дасян, кын улэ гырон ужъёс быдэстӥсько. Толйись ӟегез Владимир Зидымаков но Иван Рафиков кизё. Силос дасяло комбайнёръёс Геннадий но Эдуард Гайнияровъёс, водитель Вадим Габоков. Трамбовкаын – трактористъёс Владислав Рахимов но Дмитрий Гильманшин.

Калтасы ёросысь «Победа» ООО-лэн Бадӟым Качакысь участоказ ужасьёс ӟегзэс октыса быдтӥллям: 240 гектарысь 5600 центнер ю тысь басьтӥллям.

- Кӧжы бусые потэммы вал, куазь зорыны кутскиз. Кӧжы огъя 200 гектаре киземын, та дыре солэн 80 гектарез басьтэмын, - вера Бадӟым Качак участокен кивалтӥсь Назиф Абдуллин. – Пусйымон ужъёссы комбайнёръёслэн Антон Зайруллинлэн, Сергей Пакриевлэн, Алексей Тимиряевлэн, Вадим Мингараевлэн, ю тысь нуллӥсьёслэн Виталий Минликаевлэн, Руслан Байтимировлэн, Владимир Смагуловлэн, Вадим Абкаримовлэн.

Бадӟым Качакын толйись ӟег кизён ужъёс но азинско. «Джондирен» Фатхиев Радис кизе, кидыс нуллэ водитель Юрий Насипуллин.

Янаул ёросысь «Колхоз Восток» СПК-ын ужасьёс ӟег октыны 4-тӥ гудырикошконэ потӥллям. Валтӥсь агрономлэн Фёдор Тимирзяновлэн верамезъя, туэ хозяйствоын 413 гектаре ӟег киземын. Та дыре 150 гектарысь ю тысь басьтэмын. Солэн удалтонлыкез гектарысьтыз шор лыдын 20 центнерлы ӵоша, пе.

- Комбайнёръёс Геннадий Тимирзянов, Игнат Алетдинов, Николай Насибуллин, водительёс Ильдар Насибуллин, Алик Зайнуллин, Сергей Каримуллин шулдыр нуналлэсь котькуд чассэ пайдаё ортчытон сярысь сюлмаськыса ужало, - вера агроном. – Аран-кутсан сяна, хозяйствоын пудо сиён дасян уж но азинске. Кык гу кумбагышлэсь силос лёгамы, али пӧртэм одӥг аръем турынъёслэсь тыриськом. Азьпалан кукурузалэсь тыромы на. Татын пусъёно комбайнын ужасьёслэсь Олег Тимиргалиевлэсь, Альфит Шарафисламовлэсь, Валентин Заировлэсь но Афанасий Насибуллинлэсь ужзэс.

Востокъёс ӟег куроез скирдэ люкало. Та ужез Леонтий Надыршин, Римма Шакирова, Анна Тимирзянова, Лилия Уразбаева, Динара Гараева но Борис Шакирзянов быдэсъяло. Агрономлэн кылъёсызъя, матысь дыре востокъёс ӟег кизьыны потозы.

Дасяз

Миляуша НИГАМАТУЛЛИНА.