Кӧня лыдӟисьмы луоз вуоно арын?

1999-тӥ арын, редакциын ужаны кутскем бере, газетлы гожтӥськон мукет сяменгес радъяське вал. Соку «Ошмесэз лыдӟисьёс пӧлы вӧлмытон сярысь малпанъёс почтаын ужасьёсты сюлэмшугъяськытӥзы. Нош кык-куинь ар ортчыса, югдур воштӥськыны кутскиз. Та вакытэ почталэн но редакцилэн ужъёссы ог-огенызы герӟаськизы, шуыны луоз. Та герд сокем юн утиське, аръёс но соосты мозмытыны уг быгато.

Табере редакцилы но, Россиысь почталы но калыкез «Ошмес» газетлы гожтыны нимысьтыз план сётӥське. Почта пыр газетмы 750 экземплярен вӧлмыны кулэ. Та лыдпусэз ёросъёсъя люко на (зэм, со сярысь куд-ог почта ёзэтъёсын уг но тодо). Кылсярысь, «Ошмес» газетэз Татышлы ёросын 365 экземпляр басьтыны кулэ. Нош дунъёсты уськытыса гожтӥськон вакытысь лыдпусъёсты учконо ке, планлэн ӝыныез но быдэстэмын ӧвӧл на. Коньывуон толэзе Россиысь почта 20 нуналлы дунъёсты уськытӥз вал. Но, жаляса верано, та вакытэ ёросъёсын газетмылы гожтӥськон огвыллем ӧз радъяськы. Балтач ёросын гинэ пыр-поч ужазы, кызь нунал куспын ужзэс йылпумъяны вуттӥзы. Асавкаын, кылсярысь, почтальонзы декада кутскемлэсь азьвыл газет лыдӟыны мылкыд карисьёсты гожъяса потӥз. Нош собере, дунъёс тодмо луэм бере, коньдонзэс басьтылӥз. Ёросысь почтальонъёс оскыто, «Ошмес» газетлы гожтӥськонэз декабрёзь азинтозы на шуыса.

Газетлы гожтӥськон мукет ёросъёсын калленгес азинтӥське. Одӥгаз «Ошмесэз» лыдӟыны ум быгатӥське шуо. Мукет удмурт газетъёслэн кылзы валамонгес, пе. Со дыре ик, уг янгышаськы ке, Башкортостанын Удмурт Элькунын анай кылынымы потӥсь газетэз но лыдӟисьёс ӧвӧл. Нылпи журналэз гинэ басьто ке шат? Озьы ке, лыдӟисьёсмы чылкак пӧртэмесь луыны кулэ. Нош одӥгаз почта ёзэтын организациосын ужанлэн пайдаез, пе, ӧвӧл шуо. Озьы коньдонзы палэнэ кошке. Нош газет лыдӟисьёслэн лыдзылэн йылэмез сярысь татын малпась ик ӧвӧл, лэся. Мукетаз гуртын но югдур пӧртэм ӧвӧл. «Декада вакытэ почтальонэз но ӧм адӟе», - ӝожтӥсько татын. Декада бере одӥг арня ортчыса но соос доры почтальон ӧз вуы на…

Гожтӥськон вакытэ таӵе суредэн но пумиськыны кылдэ: редакцилы матысь гуртын улӥсь лыдӟисьмылы альтернативной амалэн (редакция пыр) газетлы гожтӥськыны ӵектӥськом. «Уг, - шуэ лыдӟисьмы, - дорамы почтальон вуоз ай, соку гожтӥсько». Лыдӟисьмылэсь йырзэ дунтэмгес гожтӥськон дунын но берыктыны ӧз пӧрмы. Газетлы со, дышем сямызъя, почтальон пыр гожтӥськем. Кызь ар ӵоже ни «Ошмесэз», пе, басьтӥсько. Азьланяз но гожтӥсько на, шуэ. Мед гинэ, пе, вуоз газетмы лыдӟись кие.