Рождествое - Лапландие

"Ми туэ нырысьсэ католической Рождество дыръя братэлэн семьяеныз Лапландие ветлӥм. Мон ужысьтым арнялы отпуск басьтӥ, кык семьялы азьпаласен корка бронировать карим. Рованиеми городозь мынонэз 800 км пала, дугдылытэк машинаен 9 час лусал. Ми 3 пол дугдылыса 10 час мынӥм. Сюрес вылэ потыкумы асьме городамы Кераваын лымы чик ӧй вал. Кылем тол вылтӥ но лымыез одӥг но ӧм адӟылэ. Соин лымылэсь туж мӧзмиськиз ни вал. Лапландие вуыса, мылкыдмы куашказ. Температура +1 но ваньмыз сямен лымы шунаса быремын. Мылкыдмы тупатскиз, куке вуим снять карем коркаямы. Со вал финн стилен туж мыло-кыдо корка: пушкыз быдэсак пулэсь, зал шорын камин сылэ, минимализм, ваньмыз выль но финской ӟечлыкен. Сиён дасятозямы, мунчо эстытозямы, куазьмы но тупатскыны кутскиз. Кезьытгес луиз но лымыяны одъяз. Ӵукна султыкумы шӧдӥмы ни, зэмос Лапландие вуимы шуыса. Котырак туж чебер вал.

Путешествимылэн нырысетӥ нуналаз Йоулупуккилэн (Санта-Клауслэн) гуртаз вуылӥм. Со пырак Полярной круг вылын сылэ. Туж паймимы, куке адӟимы кунгож сьӧрысь туристъёсты. Кытысьёссэ вераны уг тодӥськы, но вал кадь испанецъёс, индусъёс, мукет азиатъёс (вераськемзыя китайской но тайской группаысь шуыса валаны луэ вал). Кинлы ке но кунгожъёс усьтэмын шуыса малпамы. Вал финнъёс но Финляндиын улӥсь ӟучъёс. Юртъёсы пырон понна ымныре одно ик маска пононо вал. Кӧня ке сувенирной магазинчикъёстӥ калгыса, Йоулупукки дӥне пырим. Отын 15 минут пала черодын сылыса, соин туспуктэм лэсьтӥм. Жаляса верано, туэ со пияла сьӧрын пуке, туспуктэмын соин туж ик уг адскы. Са нта-Клауслэн гуртэтӥз калгим, тросэз туристъёслы дасям интыос пытсамын вал коронавирусэн сэрен, но милем удалтӥз пужейёсын ветлыны. Соос туж калленэсь но гань-ганесь. Пырамы на гномъёслэн почтаязы, Удмуртие открытка келямы.

Котькуд ӝыт ми саунае пырим, праздничной ужин карылӥмы, бӧрысь пиналъёсын ӝӧквыл шудонъёсын шудылӥмы. Ветлӥмы ми ньыль кузя но Мишамылэн семьяез ньыль кузя. Туж по-семейному шуныт ортчиз Рождествомы".