2020-тӥ арын финн-угор дуннелэн шоркарез Башкортостанысь Мишкино селоын луоз

«Мишкино – 2020-тӥ арлэн финн-угор столицаез» проект ужзэ 6-тӥ толшоре мытӥз. Мишкиноысь ёрос культура дворецын Марий-Элысь Морки ёросысь Шоруньжа селоысь делегация шоркарлэсь тодметпуссэ (символзэ) Мишкино селолы сётӥз. Ужрадэ Башкортостанлэн пӧртэм ёросъёсысьтыз, Марий-Элысь, Удмурт Элькунысь, Татарстанысь, Эстониысь куноос пыриськизы. Удмуртъёсты финн-угор праздникын возьматӥзы БР-ысь историко-культурной центрысь валтӥсь ӧнерчи Ирина Самигулова но Татышлы ёросысь Калмияр гуртысь «Италмас» ансамбльын эктӥсь нылъёс Кристина Шайсултанова но Александра Шартдинова, Калтасы ёросысь Вылысь Тыхтем гуртысь «Ингур», Бурай ёросысь Алтау гуртысь «Инвожо» ансамбльёс. Соос ваньзы пор бускельёссылы но кылъя ӵыжы-выжыоссылы ӟеч уж сӥзизы, задор мылкыд кузьмазы. Куатетӥ шоркаре нырысетӥ финн-угор шоркарысь – Быги гуртысь – делегация но вуылӥз. Куноосты торжественной люкетэз бӧрсьы пӧртэм гуртъёсы нуизы. Отын соослы «Шорык йол» («Така кук») обрядовой праздник возьматӥзы. Со удмуртъёслэн «Пӧртмаськонзылы» тупа.