Кыдёкын-а, матын-а?

1999-тӥ арын инвожо толэзе отысь одӥгез группа, дас ньыль кузя студентъёс но кивалтӥсьсы Кадри Виирес, Башкортостанысь финн-угор калыкъёс доры вуылӥз. Соос камсьӧр удмуртъёс, восточной поръёс но республикаын улӥсь эстонъёс дорын ужазы. Эстон экспедициез радъяз но соосын ӵош ветлӥз удмурт тодосчи Татьяна Миннияхметова. Студентъёс фото- но видеосъемкаос, фонозаписьёс, зарисовкаос, интервью лэсьтылӥзы, ӵыжы-выжы калыкъёс дорын улэмзы сярысь дневникъёс нуизы, вӧсе пыриськизы. Эстониын арлы быдэ ӵыжы-выжы калыкъёслы сӥзем дырпус (календарь) потто. Та экспедицилэн материалъёсыз куд-огез потӥз удмуртъёслы сӥзем бамын. Кылсярысь, отын Татышлы ёросысь Выль Татышлы гуртын Гульчира Садиевалэсь суредам сыргаез возьматэмын вал. Тросэз ужъёссы возьматӥськизы Эстониын ортчылэм пӧртэм адӟытонъёсын. Удмуртъёс доры вуылэм материал, туспуктэмъёс но Триину Юрвес студенткалэн Выль Татышлы гуртын улэмзы сярысь чакланъёсыз пыремын та выль книгае но, кудзэ поттӥз экспедициен кивалтӥсь Кадри Виирес.