-18 °С
Салкым
Антитеррор
Вань иворъёс
Финн-угор дуннеын
23 ноябрь 2017, 13:13

Визьмоослы – визьмо сюрес!

Та нуналъёсы кык егит но йӧно финн-угор тодосчиос – Николай Анисимов но Татьяна Алыбина - философияя докторъёс луизы. Соос кыкназы но вордӥськем шаеръёсысьтызы университетъёсты йылпумъяса, Тарту университетысь докторантураын дышетскизы. Диссертациоссэс отын ик гожтӥзы но отын ик утизы.

Та нуналъёсы кык егит но йӧно финн-угор тодосчиос – Николай Анисимов но Татьяна Алыбина - философияя докторъёс луизы. Соос кыкназы но вордӥськем шаеръёсысьтызы университетъёсты йылпумъяса, Тарту университетысь докторантураын дышетскизы. Диссертациоссэс отын ик гожтӥзы но отын ик утизы.
Шулдыр кырӟась удмурт пияшез Николай Анисимовез асьме палан но туннэ нуналэ умой тодо. Камсьӧр удмуртъёс доры со ӵем вуылӥз, гуртъёстӥ ветлыса, калыкен вераськыса ужаз, узыр материал люказ. Асьме палась удмуртъёс сярысь со диссертацизэ утьыкуз но трос вераськиз. Гожтэм ужзэ Н. Анисимов «Диалог миров» в матрице коммуникативного поведения удмуртов» нимам. Солэн научной кивалтӥсьёсыз вал Тарту университетысь тодосчи Мадис Арукаск но Удмурт университетысь тодосчи Галина Глухова. Ужзэ комиссия азьын утьыкуз солы оппонентъёс луизы Эстон литературая музейысь тодосчи Аадо Линтроп (кудӥз аслэсьтыз диссертацизэ удмурт темая гожтӥз) но Удмурт историяя, кылъя но литературая институтысь тодосчи Елена Попова. Та темаез Н. Анисимов нырысьсэ академия удысын выль сямен эскырыны ӵектыса, туж тунсыко но мур эскерыса уж гожтэм: кык дуннеос – тапал но сопал дуннеос – вискын кыӵе кусып возиське? Малы со озьы луэмын? Та выллем юанъёслы пыр-поч валэктонъёс сётэ со диссертацияз. Со сяна, Николай камсьӧр удмуртъёслэсь удмуртлыкез валанзэс но дунне шоры учкон амалзэс ӟеч утьыса возьыны быгатэмзэс туж яркыт пусйиз. Со азьланезлы но ужпум пуктӥз – кыӵе тужгес сюлмаськытӥсь юанъёслы валэктонъёс утчано, пыр-поч мае эскерыны кулэ. Николай сюлмысьтыз туж бадӟым тау кылъёс вераз аслаз информантъёсызлы. Соостэк солэн ужез сыӵе тунсыко но тырмыт ӧй, пе, луысал.
Кыкетӥез диссертация «Трансформация марийской религиозной традиции в постсоветский период» нимаськиз. Сое Марий-Элысь пор нылаш Татьяна Алыбина гожтӥз. Солэн кивалтӥсьёсыз вал Тарту университетысь тодосчи Арт Леэте но Поволжье технологияя университетысь тодосчи Галина Пурынычева. Ужзэ дунъязы оппонентъёс - Парижысь шундыӝужан пал кылъёсъя но культураосъя институтысь тодосчи Ева Тулуз но Инсбрук университетысь тодосчи Татьяна Миннияхметова.
Т. Алыбиналэн ужаз туж мур возьматэмын берло аръёсы пор калыклэн осконаз воштӥськись ужпумъёс но соослы валэктонъёс. Татьяна но трос гуртъёстӥ ветлыса узыр материал люкам, ваньзэ пыр-поч сэрттыса-пертчыса валэктонъёс утчам. Башкириын улӥсь поръёслэн оскон амалъёссы сярысь но солэн ужаз вераськон мынэ. Диссертант возьматэ, кыӵе ӝог воштӥськонъёс мыно оскон удысын, кыӵе сюресэ соос вуттыны быгатозы зэмос калык сямез но калык визез, солэсь йылолъёссэ но соин валче улон амалзэс.
Сюлмысь ӟечкылан кылъёс егит тодосчиослы, азьпал сюрессы вольыт но тунсыко мед луоз, выльзэ утчан но шедьтон мылкыдзы ноку медаз кысы, яркыт но сайкыт малпанъёс, ӟечесь но визьмоесь ужъёс мед пӧрмытъялозы.
Татьяна
МИННИЯХМЕТОВА.
Инсбрук.