Ужбергатон борды кужмо адямиос кутско

Республикамылэн Тӧроезлэн верамезъя, инвестициос ласянь Башкортостан рейтингын 40-тӥ интыысь 20-тӥе ӝутскиз. 2010-тӥ арысен 2015-тӥ арозь республикаямы инвестициослэн быдӟалазы кык поллы будӥз. Кылем арын со 316 миллиард манетлы ӵошаз.

- Туннэ республикаямы экономика ласянь секыт югдур кылдэмын. Со инвестициос бордын но шӧдӥськытэк уг улы, - вераз Рустэм Хамитов. – Асьмелы республикаямы инвестициосты кыскон бордын туннэ бадӟым ужъёс нуоно. Соостэк промышленностьмы уз азинтӥськы. Соин валтӥсь ужпуммы – бадӟым инвестиционной проектъёсты быдэстон. Со понна пӧртэм ужбергатонъёсты азинтоно.

Заседаниын Рустэм Хамитов калык пӧлын ортчытэм юалляськонлэн йылпумъянъёсыныз тодматӥз. Кылем арлэн пумаз тодмо луиз угось: юалляськонэ пыриськемъёслэн куать процентэз ужбергатонэн выро, 2,5 %-эз матысь дыре ужзэс усьтыны малпало, 25 %-эз ужбергатон борды кутскысалзы но, коньдонзы ӧвӧл. Со сяна, тросэз ужбергатон борды кутскыса коньдонзэс ыштыны кышкало.

- Туннэ ужбергатон борды кутскисьёс трос шуг-секытъёсын пумиськоно луо. Нырысь ик, соослы кивалтӥсьёс ӵемысь люкето. Собере бадӟым предприятиос покчи ужбергатонлы азинскыны люкето, - вера Р. З. Хамитов. – Ужбергатон борды коньдон, табыш поттыны, матысь адямиоссылы ӟеч улон кылдытыны малпась адямиос лыкто. Со – улонлэн, рыноклэн куронэз.

Республикалэн Тӧроезлэн кылъёсызъя, Башкортостанысь кивалтэт калыклы валэктыны кулэ: ужбергатонын котькин азинсконъёс басьтыны быгатэ.

- Рейтингысь интыос сьӧры кыстӥськыса, ужбергатон борды кутскыны малпась калык сярысь вунэтоно ӧвӧл, - вераз Рустэм Хамитов. – Соослы юрттыны тыршоно.