«Лыдӟиськыны яратӥсько. Тунсыко веросъёс кельшо»

Та туспуктэм вылысь тӥ пальпотӥсь ымныро, сайкыт синмо чебер нылашез адӟиськоды. Солэн нимыз но ас кадяз ик чебер - Азалина. Со Бурай ёросысь Касиярово гуртын улэ,Выль Тазлар школаын 6-тӥ классын дышетске, математикая, ӟуч но удмурт литературая, трудъя урокъёсты яратэ. Азалина Галиханова мукет предметъёсты но ӟеч тодэ. «Витьёсын» гинэ эшъяське. «Лыдӟиськыны яратӥсько. Тунсыко веросъёс кельшо», - вера нылаш. Книгаосын эшъяськемез ик, луоз, солы кылбуръёсты вольыт лыдӟыны юртто. Азалина кылбур лыдӟисьёслэн ёрос конкурсысьтызы трос дыръя вормонэн бертэ. Со сяна, нылаш усто суредаське на. Инкуазь, пудо-животъёс, пе, умой пӧрмо. «Анаен ӵош пӧраськыны, пыжиськыны, керттӥськыны яратӥсько на. Керттӥськыны анае сяна, трудъя дышетӥсьмы Луиза Галинуровна но дышетэ, - вера нылаш. – Нош атаен ӵош мон куасэн ветлыны яратӥсько. Танып шур дуре ӵошен васькиськом. Куд-ог дыръя гужем чорыгаськом. Мыным чорыгъёс шер шедё. Нош атай бадӟымесь чипейёс кутылэ».

Азалина спортын но висъяське. Капчи атлетикая, куасэн бызьылонъя ёрос ӵошатсконъёсын кужымзэ эскере. Али солы кыкетӥ но куинетӥ интыосын буйгатсконо луэ на. Но нылашлэн ваньмыз азьпалан на. Солы но удалтон одно ик пальпотоз.

Марина НИКОЛАЕВА.

Бурай ёрос.