Анай кыл доры сюрес

Паськыт интернет дуннеын Валерия Алексеевалэн малпанъёсыныз пумиськи. «Кызьы кылэз ыштоно?» статьяяз со гожтэ: «Кылэз ыштыны, копак вунэтыны куинь-ньыль поколение тырме». Кызьы тае валано?

Нырысетӥ поколение - со адямиос, кудъёсыз одӥг кылын гинэ верасько. Та поколениысь адями тыршыса дышетэ титульной нацилэсь кылзэ. Соослы та уж секытэн сётӥське. Вераськоназы пумисько трос пӧртэм янгышъёс: кылъёсты веран пумысен (акцент), лексической но грамматической. Шонертэм вераськемзы понна соосты исало, ултӥяло. Соин ик соослэн быдэсак мозмытскемзы потэ анай кылзылэсь.

Кыкетӥ поколение – со сыӵе адямиос, кудъёсыз анай кылзэс пичи дырысен ик тодо. Соос кык кылын одӥг кадь вольыт вераськыны быгато: доразы асьсэ анай кылынызы верасько, нош дорзылэсь палэнын – мукет кылын. Куд-огез та поколениысь анай кылзэс санэ уг басьто, нырысетӥ поколение выллем ик. Нош куд-огез анай кылзэ гажа, малы ке шуоно со вала, анай кылэз тодэм но вераськыны быгатэм мултэс ӧвӧл шуыса, со юрттэт сётэ мукет кылэз дышетыны.

Куинетӥ поколение – со кыкетӥ поколение кадь ик. Но пӧлазы вань кык кылэн вераськисьёс но, титульной кылзэс гинэ тодӥсьёс но. Та поколениын анай кыллэн улонэз, кулэлыкез быре. Ӵем дыръя куинетӥ поколение анай кылзэ анай-атайёсызлэсь уг кылы, кылэ сое гуртын улӥсь песяй-песятайёсызлэсь.

Ньылетӥ поколениысь адямиос анай кылзэс уг тодо ни. Соос кӧня ке кыл, одӥг-кык фраза гинэ тодо. Та поколениысь адямиос анай кылынызы вӧл-вӧл вераськыны уг быгато ни.

Статьяез умой-умой лыдӟыса, мон валай, мон кыкетӥ поколение пырисько шуыса. Анай кылме кылӥсько вордӥськем дырысен. Мынам анае но, атае но удмурт кылын верасько. Дорын ми котьку удмурт сямен вераськиськом. Вань ӵыжы-выжыосы тодо но верасько удмурт кылын. Школаын но ми удмурт кылэз дышетӥськом. Туала улонын пумисько сыӵеос, кудъёсыз анай кылзылэсь возьдасько, ӟуч кылын вераськыны курадӟо. Таӵе пӧртмаськон мон понна туж умойтэм, малы ке шуоно, нырысь ик, анай кылдэ гажамысь дугдӥськод; кыкетӥез – ӟуч кылэз сантэмаськод.

Мынам нылпиосы куинетӥ поколение луозы. Соос бордысен кыл бырыны быгатоз. Мон удмурт калык пӧлын ӧй улы ни ке, мон нылпиосме анай-атае доры ысъяло. Соос удмурт сямен вераськозы, выжызы сярысь тодозы, удмурт кырӟанъёс кырӟалозы. Мон ачим но соослы удмурт выжыкылъёсты, мадиськонъёсты лыдӟо.

Кыӵе гинэ городэ, кунэ тон уд вуы, вунэтоно ӧвӧл ас кылдэ, сое утьыны тыршоно. Анай кылэн кутскиз тынад улонэд, вамышед, азьпал улонэ учконэд. Мон – удмурт, уг кышкаськы удмуртлыкелэсь, кышкасько кылылэн быремезлэсь. Улӟытод на-а сое выльысь?

Елизавета ДАВЛЕТОВА.

Янаул ёросысь Каймашабаш гурт.