-14 °С
Лымы
Антитеррор
Вань иворъёс
Дышетон
20 декабрь 2018, 16:35

Нылпиос школалэсь данзэ ӝуто

2008-тӥ арын Бурай ёросысь Касияровоысь школа ворсаськемен сэрен, гуртысь нылпиос дышетсконзэс Выль Тазлар шор ёзо школаын азинто.

Туэ татын огъя 93 пиналъёс тодон-валан басьто. Соос пӧлысь 25-ез гинэ Выль Тазларысь луо, мукет дышетскисьёс куать гуртъёсысь ӵукна автобусэн вуо. Жаляса верано, таяз дышетскон арын Касияровоысь сизьым нылпиос гинэ дышетско. Нош куке но татчы тужгес троссэ 18 пиналъёс дышетскыны ветлӥллям. Шумпотоно, али сизьым дышетскисьёс пӧлысь 10-тӥ классысь Ренат Садыков но куатетӥ классысь Азалина Галиханова - «витьчиос». Со сяна, соос - кылбур лыдӟыны усточиос. Котькуд ар кылбур лыдӟонъя ёрос конкурсын вормисьёс пӧлын луо. Мукетъёсыз дышетскисьёс но - Регина но Рената Ушияроваос, Никита Ахметшин, Виктория но Виталий Шартдиновъёс - «ньыльёс» но «витьёс» гинэ басьтыны тыршо. Нылпиос ваньзы спортэн эшъясько на. Ренат, Азалина но Виталий куасэн бызьылонъя ёрос ӵошатсконъёсысь котьку вормонэн берто. Озьы соос школазылэсь данзэ ӝуто. Спорт ужрадъёсын вормонъёс басьтонын физкультурая дышетӥсьсылэн, 25 ар та удысын тыршем Касиярово гуртысь Айрат Садыковлэн но кужымез бадӟым, дыр. Пиналъёс уго школаын сяна, гуртазы но куасэн нискыланы ярато.
Выль Тазлар школаын куинь анай кылъёсты – бигер, башкир, удмурт - дышето. Удмурт кылэз 2003-тӥ арысен ни Расима Раянова нуэ. Сое Касияровоысь нылпиослэн кыкетӥ анайзы, шуыны луоз. Уго соосты Расима Исламгалиевна котьку аслаз бурд улаз басьтэ. «Выль Тазлар школаын 2003-тӥ арысен ужасько ни. 2008-тӥ арозь 8-11-тӥ классъёсын дышетскисьёслы удмурт кылъя но литературая тодон-валан сётӥ. Со сяна, ӟуч кылъя но литературая урокъёс нуисько вал. Али анай кыллы гинэ дышетӥсько на», - вера 28 ар дышетон удысын тыршем Расима Исламгалиевна. Школаын удмурт кылэз дышетыны нимысьтыз кабинетсы вань. Со пичи ке но, быгатыса тупатэмын. Дышетскыны нылпиослы книгаос тырмыт, пуштроссы но соослэн умоесь, пе. Расима Исламгалиевна ужаз выль методической пособиос, разработкаос кутэ. Соосты со ачиз Удмурт Элькунысь тодмоосыз пыр басьтыны сюлмаське. Сюлэмзэ поныса тыршемезлэн емышез но вань уга, дышетэм пиналъёсыз республикаямы радъяськись «Пою мою республику» конкурсын котьку вормисьёс пӧлын луо. Нош али школаын выль арлэн матэктэмез шӧдӥське. Дышетскон юрт выжыкылын кадь чеберъямын. Школае пырыкуд кыӵе гинэ пӧйшуръёс тонэ уг пумитало! Таӵе чеберлыкез кылдытонэ Касияровоысь нылпиос но кужымзэс понӥллям. Со сяна, соос али тыршыса выль ар празднике сценкаос, кырӟан-эктонъёс дасяло. Соослы конкурс, пе, радъяськоз.
Касияровоысь пиналъёс бигер школаын дышетско ке но, анай кылзэс гажамзы шӧдӥське. Куспазы соос чылкыт удмурт кылын верасько. Пӧлазы бигерзэ тодӥсьёс но вань, тросэз уг ке но верасько - валало. Кызьы шуо, трос кылъёсты тодэм ноку уг люкеты.
Марина НИКОЛАЕВА.
Бурай ёрос.