-15 °С
Яркыт
Антитеррор
Вань иворъёс
Дышетон
6 Куарусён 2018, 13:55

Дышетон юртэ сюрес медаз быры

Дышетӥсьёс понна гудырикошконлэн пумыз – ортчем дышетскон арлы йылпумъянъёс лэсьтон, ёросысь та удысын тыршись эшъёсын пумиськон но выль дышетскон арлы ужан планъёс пуктон. Кылем арняын республикамылэн ёросъёсаз дышетӥсьёслэн август конференциоссы ортчизы.

Дышетӥсьёс понна гудырикошконлэн пумыз – ортчем дышетскон арлы йылпумъянъёс лэсьтон, ёросысь та удысын тыршись эшъёсын пумиськон но выль дышетскон арлы ужан планъёс пуктон. Кылем арняын республикамылэн ёросъёсаз дышетӥсьёслэн август конференциоссы ортчизы.
Татышлы ёросын со 29-тӥ гудырикошконэ радъяськиз. Ужрадэ Башкортостан Республикаысь вуз каронъя но басьяськисьёслэсь правооссэс утёнъя кун комитетэн кивалтӥсьлэн воштӥсез В.А. Белов, «Газпром трансгаз Уфа» ООО-лэн валтӥсь директорез, БР-ысь Кун Собранилэн-Курултайлэн депутатэз Ш.Г. Шарипов, БР-ысь Наукаосъя академилэн президентэз А.С. Гаязов, ёросысь школаосын но нылпи садъёсын ужасьёс, гурт поселениослэн администрациосынызы кивалтӥсьёс, дышетонъя управлениын тыршисьёс пыриськизы.
Татышлы ёрос администрациен кивалтӥсь Р.К. Гараев дышетӥсьёсты выль дышетскон арен ӟечкылаз, Татышлы ёрос центрысь но гуртысь школаослэсь ӟеч тодон-валан басьтонын азинлыко ужамзэс но нылпи садъёслэсь дышетон удысын инъет луэмзэс пусйиз.
А.С. Гаязов вераськоназ таӵе лыдпусъёсты пыртӥз: 1968-тӥ арын республикаысь школаосын 880 000 нылпи дышетскем ке, 2011-тӥ арын та лыдпус 444 000-лы ӵошам. Арысь аре нылпиослэн кулэсмемзы, оптимизация вуттӥзы, вылды, таӵе югдуре: кӧня школалэн ӧсъёсыз пытсамын ни, кӧня дышетӥсь ужтэк кылемын, кӧняез дышетӥсьёс палэнысь гуртъёсы ветлыса ужано луо. Соослэн ужпумзы – улон коже выёнтэм понна тыршон, дышетонлэсь ӟечлыксэ, семьялы саклык висъяны дыр кыльымтэез но трос мукетсэ лыдэ басьтытэк. «Номыр шоры учкытэк, нырысь ик тӥледыз мед гажалозы, тӥ пушкысь личностьтэс мед адӟозы», - пусйиз Альфис Суфиянович.
Татышлы ёросысь дышетонъя ёзэтэн кивалтӥсьлэн А.М. Фарвазетдиновлэн докладаз дышетӥсьёсын но дышетскисьёсын герӟаськем ужпумъёс но вормонъёс чузъяськизы. Кылем дышетскон арын ёросысь школаосын 2920 нылпи дышетскем. Одӥг классын 14 пинал луыны кулэ ке, нош асьмелэн со 13,8-лы ӵоша. Одӥг дышетӥсьлы 8,9 пинал усе, кулэ - 11. Тросэз школаос ворсаськемен яке филиалъёслы кылемен, 54 гуртъёсысь нылпиос дышетскон юртъёсазы ӵукналы быдэ автобусэн ветлоно луо. Озьы ке но соослэн тодон-валанзылэн ӟечлыксы уг усьы.
Арлы быдэ та форумын устооссэ школаосты но нылпи садъёсты пусъё. Основной школаос пӧлын 1-тӥ инты сётэмын Уразгильды школалы, начальной школаос пӧлын 2-тӥ интыын луиз Вязовка школа.
Школа но нылпи сад бордын сяськаос, бакча сиёнъёс будэтонын Выль Татышлы школалэн но Бальзюга нылпи садлэн учебно-опытной участокъёссы 2-тӥ но 1-тӥ интыосын пусъемын.
Татышлы ёрос администрацилэн Данъян грамотаезлы туэ кузё луизы Выль Татышлы школаысь ӟуч кылъя но литературая дышетӥсь Н.М. Латипова, Вылысь Татышлыысь 1-тӥ номеро школаысь физкультурая дышетӥсь А.В. Муллаяров, Кальтяево шор ёзо школаын биология но химия урокъёсты нуись Л.М. Нигаматьянова.
Туэ спорт удысын бадӟым вормонъёс пиштӥллям Улысь Балтач школалы. Дышетӥсьёс пӧлын ортчытэм «Здоровье» спартакиадаын со – нырысетӥ интыын. Озьы ик та школаысь спортъя «Факел» нылпи клублэн ӟеч ужамез пусъемын (3-тӥ инты).
Вань улонзэс дышетон удыслы сӥзьыса, туэ дано юбилейзэс пусйизы дуно ветеранъёс: Улысь Балтач но Выль Татышлы школаосысь покчи классъёсты дышетӥсьёс Т.Н. Ахмадуллина но А.Г. Кабиокова, Улысь Балтач нылпи садысь воспитатель Р. М. Гильмаутдинова, Татышлы нылпи творчествоя центрен кивалтӥсь Г. Х. Мухамадиева. Та нуналэ соослы но трос шуныт кылъёс верамын вал.
Дышетӥсьёслы сӥзем концертын задор мылкыд, чебер эктонъёс-кырӟанъёс кузьмазы Калмияр шор ёзо школаысь «Италмас» ансамбль (кивалтӥсьсы Р. Фархутдинова), ёросысь удмурт дышетӥсьёслэн но Калмияр школаын дышетскисьёслэн «Шулдыр эктон» ансамбльзы (кивалтӥсьсы З. Фархутдинова).
* * *
Янаулын дышетӥсьёслэн конференцизы 24-тӥ гудырикошконэ радъяськиз. Дышетонъя управлениен кивалтӥсьлэн Эльвира Шаиховалэн докладэныз тодматӥськом.
Кылем дышетскон арын Янаул ёросын ӟеч лыдпусъёс возьматэмын. Кылсярысь, «Реальные дела» проектъя Каймашабаш, Максим, Ямады школаосын, Барабановкаысь нылпи садын тупатъян ужъёс быдэстэмын. «100 инвестиционных объектов – к 100-летию образования Республики Башкортостан» проект улсын, Янаулысь куатетӥ номеро «Василёк» нылпи сад бордын 160 нылпилы нимысьтыз корпус усьтэмын. «Василёк» туэ пичиосты аспӧртэм дуннееныз пумитаз, татын калык культураослы сӥзем «азбаръёс» тупатэмын. Нылпиос башкир, бигер, ӟуч, пор, удмурт лулчеберетэн, сям-йылолъёсын, пӧртэм калыкъёслэн историенызы тодматскыны быгатозы, пичиысен куспазы тупаса улыны дышетскозы.
Берло аръёсы нылпиос конкурсъёсы, олимпиадаосы пырисько, вормонъёслы кузё луо. Школае мыныны дасяськись пиналъёслэсь ӟеч тодон-валанъёссэс шараян вылысь, туэ Янаул ёросын нырысьсэ «Юные знатоки» интеллектуальной полиолимпиада радъяськем. Отчы 155 пинал пыриськем. Усто тодон-валанъёссэ возьматэмъёс пӧлын - Каймашабашысь, Сандугачысь нылпи садъёслэн командаоссы.
Нылпилэсь ӟеч дышетскемзэ тодыны быдэсросси олимпиадаос но юртто. Шумпотымон, Янаул ёросысь пиналъёс калыккуспо олимпиадаосын но висъяськемын. Кылсярысь, Каймашабашысь но Вуж Варашысь школаосын дышетскисьёс. Соослэн вормонзы школаосысь удмурт кылъя но литературая дышетӥсьёслэн Ольга Давлетоваен Алевтина Фаткуллиналэн но люкетъёссы бадӟьым.
Школалэсь азинлыко ужамзэ дышетӥсьёслэн конкурсъёсы пыриськемзы но возьматэ. Туэ «Учитель года Башкортостана – 2018» республика конкурсэ Ольга Рахимзяновна Давлетова пыриськиз, «Эссе» номинациын солэн ужезлы вылӥ дунъет сётэмын.
Дышетӥсьёслы сӥзем конференциын школаос пӧртэм адӟытонъёс радъязы, мастер-классъёс возьматӥзы. Каймашабашъёс, кылсярысь, мылкыд карисьёсты италмас сяська лэсьтыны дышетӥзы.
* * *
Ермекей ёросысь дышетон удысын ужасьёс 28-тӥ гудырикошконэ огазе люкаськыса, ужзылы йылпумъянъёс лэсьтӥзы но азьланьысь ужзы сярысь кенешизы. Ёросын ортчем конференцие БР-ысь Дышетонъя министр Г.Р. Шафикова пыриськиз. Со ёросысь дышетӥсьёслэсь ӟеч но тыршыса ужамзэс пусйиз: республика ужрадъёсы мыло-кыдо пыриськемзыя ермекейёс 20 усто ёросъёс пӧлы пыро. Дышетон удысын ужасьёслэн но дышетскисьёслэн вормонъёссылы, ужпумъёсты сэрттон-пертчонлы сӥземын вал ёросысь дышетонъя управлениен кивалтӥсьлэн О.М. Никитинлэн докладэз. Купченеево школаысь нылпиослы кема аръёс ӵоже ӟеч тодон!валан сётэмез пусъемын Н.А. Константиновалэн. Туэ со пенсие потэм.
Дасязы Анна БАЙДУЛЛИНА, Миляуша БУЛАТОВА.
Читайте нас в