-23 °С
Яркыт
Антитеррор
Вань иворъёс
Дышетон
23 куартолэзе 2018, 16:27

Асавка школа улонэ сюрес усьтӥз

Нылпи садэ ветлэмысь дугдэм бере, мыным анай вераз: «Тыныд школае мыныны дыр вуиз».

Нылпи садэ ветлэмысь дугдэм бере, мыным анай вераз: «Тыныд школае мыныны дыр вуиз». Дышетӥсед, пе, Валя апай луоз. «Кин меда со? - малпаськи ас поннам. Но одӥг шулдыр гужем нуналэ, азбарын шудыку, кин ке вазись луиз:
- Вики, школае мынод-а?
- Мыно, - шуисько.
Озьы мон тодӥ анаелэсь кин сярысь верамзэ. Каникул нуналъёс туж ӝог ортчизы. Дыр вуиз школае мыныны. Гудырикошкон толэзе ми школае кылбуръёс, кырӟанъёс дышетыны ветлыны кутскимы, эшъёсынымы тодматскимы.
Ньыль ар ӵоже Валентина Нуртдиновналэн бурд улаз дышетским. Мыным туж кельшо вал солэн кылъёсыз, дышетэмез, урокъёсыз. Милемлы со котьку «нылы» шуыса вазьылӥз. Соин ик ми урокъёс бере ноку доре бертыны ӧм дыртэ, пӧртэм мугъёс шедьтыса, школаын ӝегатскылӥм. Нырысетӥ дышетӥсьмы кыкетӥ анаймы выллем луиз. Пичи дыръямы со шуэ вал: «Дышетскисьёс пӧлысь кинлэн ке почеркез дышетӥсезлэн выллем луыны быгатэ». Туннэ мон данъяськисько, гожъяськонэ дышетӥселэнлы тупа шуыса.
Школаез йылпумъяммы дырысен 9 ар ортчиз ни. Озьы ке но нырысетӥ дышетӥсьмы котькудмылэн тодамы на. Малы ке шуоно со милемыз ог-огмес, котырысьтымы калыкез, анай кылмес гажаны, чиданы дышетӥз. Ноку уг вунэты Валентина Нуртдиновналэсь милемыз асьме калык дӥськутмылэсь чеберзэ валаны дышетэмзэ.
Валентина Нуртдиновна Ишназарова кема аръёс ӵоже ни Асавкаысь школаын ужа. Со пыр олокӧня дышетскисьёс потэмын. Туннэ дышетӥсьмылы шуд, тазалык сӥземмы потэ. Тӥ котьку мед данъяськоды дышетэм пиналъёсыныды, соос понна мед шумпотоды.
Виктория
КИРЬЯНОВА.
Чайковский город.
Читайте нас в