Ум вунэтэ асьме выжымес но кылмес

Ульяновскысь нылпи лыдӟиськонэз азинтонъя фонд библиотекаос пӧлын «Наши истоки. Читаем фольклор» быдэсросси акция радъяз.

Акцие Ермекей ёросысь Купченеево гуртысь библиотека но азинлыко пыриськиз. Библиотекаен кивалтӥсез Нина Пургинаез, нылпиослы калык культураез гажан но утён мылкыд пыӵатэмез понна, дипломен пусйизы.

- Акция улсын, арня ӵоже гуртысь нылпиослы пӧртэм ужрадъёс ортчытӥ. Кылсярысь, «Анай кыллэн крезьгурез» литературно-музыкальной познавательной ужрадэ школаын дышетскисьёс пыриськизы. Соку трос вераським удмурт калык фольклор сярысь. Пиналъёс понна «Данъяське вордскем кылыныды!» адӟытон радъямын вал. Ужрадэ вуэмъёс котькудзы доразы удмурт книгаосын но газет-журналъёсын бертӥзы, - вера Н. Пургина.

Купченеевоысь «Василёк» нылпи садэ ветлӥсьёс но акцилэсь палэнэ кылиллямтэ. Соосты Нина Васильевна нуны веттан удмурт гуръёсын, маскаръяськон амалъёсын тодматэм. «Лыдӟом-вералом» шудонын пичильтыкъёс удмурт мадиськонъёсты тодӥллям.

Фольклорлы сӥзем арня «Асьмелэн выжымы. Ми лыдӟиськом фольклорез» книгаослы адӟытонэн но покчи классъёсын дышетскисьёс пӧлын ӟуч калык выжыкылъёсъя конкурсэн йылпумъяськем. Пусъёно, ужрадъёсты Нина Васильевна удмурт калык дӥськут дӥсяса радъям. Озьы со котькуд пумиськонлы аспӧртэм шӧм пыртэм.

Миляуша БУЛАТОВА.

Ермекей ёрос.