Анай кылзэс гажан мылкыд пыӵатэ

Дышетӥсь. Та кылэз кылыса, котькин пичи дыраз берытске, дыр. Нырысетӥ гырлылэн жингыртэмез, нырысетӥ дышетӥсьлэн мусо учкемез, урокын басьтэм «витьёс», нырысетӥ «кык», экзаменъёс, нырысетӥ яратон, берпуметӥ гырлылэн куараез, аттестат – со ваньмыз школа, кытын тонэ улон сюресэд кузя нуо дышетӥсьёс.

Янаул ёросысь Вуж Варяшысь Алевтина Фаткуллина дышетӥсьлэсь ужзэ анай-атаезлэн мылкыд каремзыя быръем ке но, школа дуннее вамыш лэсьтэмез пумысен со чик уг жаля, ужзэ сюлмысьтыз яратэ. УдГУ-ысь филологияя факультетэз йылпумъям егит дышетӥсь нырысь Сарапулысь одӥгаз школаын ужано луэм, 2000-тӥ арын Вуж Варяш школаын дышетыны кутскем. Нырысь солы пӧртэм предметъёсты – суредаськон, труд, история - нуоно луэм. Ньыль ар ӵоже Алевтина Анатолиевна завучлэсь ужзэ но быдэсъям, собере нылпиослы ӟуч кылъя но литературая тодон-валан сётэм. Берло ини со удмурт кылъя но литературая урокъёсты нуэ, нылпиослы анай кылзэс гажан мылкыд пыӵатэ.

- Котькуд урокын пиналъёслы валэктыны тыршисько, макем бадӟым инты басьтэ анай кылмы асьмелэн улонамы. Удмурт кылмы ке быриз, удмуртъёс но бырозы, асьмеды тодӥсьёс но уз луэ ни шуыса валэктӥсько, - вера А. А. Фаткуллина.

Алевтина Анатолиевна дышетскисьёсыныз пӧртэм конкурсъёсы, олимпиадаосы пырисько, вормонъёслы кузё луо. Кылсярысь, кылем арын дышетскисез Диана Насибуллина удмурт кылъя олимпиадаын республикаын нырысетӥ интыын луиз. Нош исследовательской ужъёс быдэстонъя «Мои шаги в будущее» быдэсросси конкурсын Дианалэн ужез куинетӥ интыен дунъямын. Ужзэ со школалэн историезлы сӥзем вылэм. Та ик конкурсэ Арина Фаткуллина но пыриськем. Солэн Выль Варяш гуртлэн фольклорезлы сӥзем ужезлы кыкетӥ инты сётэмын. «Шудекын удмурт кылэз дышетонлы сӥзем ужрад ортчиз. Отын кылбур лыдӟисьёслэн конкурссы радъямын вал. Анастасия Минигалиева отысь кыкетӥ интыен берытскиз», - вера Алевтина Анатолиевна.

Дышетскисьёслэн вормонъёссы, кызьы тодмо, дышетӥсьлэсь тыршись, ужзэ валась но тодӥсь луэмзэ возьмато. Усто дышетӥсь луон сяна, Алевтина Анатолиевна – яратоно кузпал но мусо анай. Владимир Шариаздановичен соос 1997-тӥ арысен улон сюрес кузя ӵошен вамышто. Кузпалъёслэн - куинь шуд бугоръёссы. Леонид пизы УдГУ-ын дышетске. Со волейболэн эшъяське, университетлэн сборной командаяз но, пе, шудэ, анай-атайзэ вормонъёсыныз шумпоттэ. «Елена нылмы 5-тӥ классын дышетске. Эктыны, кырӟаны яратэ. Нош Дима пимы нылпи садэ ветлэ», - вера анаймурт.

Ужез, дышетоно нылпиосыз сярысь Алевтина Анатолиевна трос вераны-мадьыны быгатэ. Нош мар меда тужгес сюлмаськытэ 21 ар ӵоже школаын ужам ӧнерчиез? Со шуэ: «Удмурт кылэз дышетонлы часъёс туж ӧжыт висъямын. Азьло со озьы ӧй вал ук». Озьы ке но дышетӥсь оске – Вуж Варяш школаын удмурт кыл ноку уз быры.

Миляуша БУЛАТОВА.

Янаул ёрос.