Анай-атайёс республикалэн Тӧроезлэн кылъёсызлы дурбасьто

- Гульназ Радмиловна, башкир кун кыл но башкир анай кыл – одӥг ӧвӧл шат соос? Таиз дышетскон ар кутскытозь, школаосын башкир кылэз дышетон кызьы радъяськемын вал?

- Анай кылъёсты дышетон Россия Федерациысь Конституциен юнматэмын. Сое нырысетӥ классысен дышетыны кутско.

Таяз дышетскон арын куронъёс ӧжытак воштӥськизы. 28-тӥ гудырикошконын, Калыкъёслэн кусыпъёссыя кенешлэн заседаниез бере, Россия Федерациысь Президентлэн Владимир Путинлэн куронъёсыз потӥзы. Табере котькуд анай-атай пиналэзлы дышетыны анай кыл бырйыны но школае заявление гожтыны кулэ.

Нош башкир кыл сярысь ке верано, со котькуд дышетскон юртын нылпиослы асьсэлэн мылкыд каремзыя дышетыны ӵектӥське. Но, пусйисько, сое одно ик котькуд пиналлы ӵектоно, малы ке шуоно со Башкортостан Республикаысь Конституциен но «О языках Республики Башкортостан» законэн юнматэмын.

2011-тӥ арысен выль федерал кун дышетон стандартъёс кутэмын. Али нылпиослэн быръёно предметъёссы пумысен родительской собраниосын вераськылӥзы. Анай-атайёс арлы быдэ заявлениос ӧз гожъялэ – сое нырысетӥ но витетӥ классъёсын гинэ кутӥзы. Табере быръёно предметъя арлы быдэ заявление гожтоно луоз.

- Республикамылэн кивалтэтэз шаермылэн Президентэзлэн куронъёсыз шоры кызьы учке?

- Владимир Путинлэн верамезъя, анай кылъёсты но, кун кылъёсты но кужмысь дышетоно ӧвӧл. Солэн таӵе кылъёсызлы республика но дурбасьтэ. Соин родительской собраниосын анай-атайёслэсь кинюртэмъёс басьтэмын.

Туннэ дышетскисьёслэн 73 процентэзлэн анай-атайёссы башкир кылэз кун кыл карыса дышетыны мылкыд каризы. Та бадӟым лыдпус. Озьыен, калык Башкортостан Республикалэн Тӧроезлэсь Рустэм Хамитовлэсь башкир кыллы юрттыны курыса вазиськонзэ кылӥз. Со возьматэ: анай-атайёс башкир кылэз дышетонлэсь кулэлыксэ шӧдо, пӧртэм калыкъёслэсь эшлыко кусыпъёссэс юнматон сярысь сюлмасько.

- Дышетонъя министерство башкир кылэз дышетонъя «пӧсь линия» радъяз. Кыӵе юанъёсын тросгес вазисько?

- Одӥг арня куспын 1,5 сюрс пол жингыртӥзы. Тужгес трос таӵе юанэн вазисько: «Кыӵе предметъёсты бырйыны луэ?» Тросэз юало, маин висъяське кун башкир кыл анай кыллэсь. Со сяна, юанъёс луизы классын дышетскисьёслэн лыдзы пумысен но. Кылсярысь, одӥг классысь куинь нылпиос одӥг анай кылэз бырйизы, мукетъёсыз – мукетсэ. Таӵе юанъёсъя ми шуиськомы: вань факультативной занятиос яке параллельной классъёслы люкиськон. Котькуд анай-атайлэн куронъёсыз, дышетон юртлэн быгатонлыкъёсызъя, быдэстэмын луыны кулэ.

Дасяз Ольга

НИГАМАТУЛЛИНА.