Выжыез уз куасьмы-а удмурт кыллэн?

Вордскем кыл – калыклэн лулыз, шуо. Кыл пыр котькуд калык вапумысь вапуме дунне шоры учконзэ, визьнодан амалъёссэ, дунлыкъёссэ выжтэ. Анай кылынымы вераськон, малпанъёсмес шараян сяна, со пыр асьмеос культурамес, дышетскем адями луэммес возьматӥськом. Кыл ке быриз, калык но быроз, шуо.

Пермь шаерысь одӥгаз удмурт гуртэ командировкае вуылыкумы, школае пырамы. Дышетӥсьёсын, нылпиосын пумиськылӥм. Татын удмурт кылэз уг дышето. Со пумысен одӥгез дышетӥсь шуиз: «Марлы кулэ нылпиослэн дневниказы мултэс «4» яке «3». Удмурт кылъя вить басьтон понна, кӧня тыршоно, кӧня правилоосты тодоно луэ, нош удмурт литератураез басьтоно ке – произведениос бордын часэн-часэн пуконо. Дырез быдтон гинэ со. Нылпиослэн со сяна но дышетскон программазы туж секыт. Та мынам гинэ кылъёсы ӧвӧл, озьы малпало тросэз анай-атайёс». Азьло аръёсы та школаын удмурт кылъя но литературая урокъёс пыро вылэм, нокин но со пумысен ӝожтӥськымтэ. Нош туала нылпиос понна со малы ке но мултэс луэ.

Кема ӧвӧл Ермекей ёросысь Купченей школаын таӵегес ик югдур луэм. Кӧня ке анай-атайёс удмурт кылэз дышетонлы пумит луэмзэс шараяллям. Та пумысен школаын собрание радъяллям.

- Удмурт кылэз дышетонтэм сярысь кылпум ӝутӥзы суро семьяос: кылсярысь, анаез пор но атаез удмурт. Собрание кема кыстӥськиз. Кыллы но вуимы. Озьы ке но огъя кужымен анай кылэз дышетонъя урокъёсты кельтыны быгатӥмы, - вера БР-ысь удмуртъёслэн НКЦ-зылэн Кенешезлэн ёзчиез, Ермекей ёросысь Выль Сулли гуртын улӥсь Анастасия Вождаева.

Удмурт кылэз дышетонлы сӥзем собрание Купченейысь Анастасия Пургина но пыриськем.

- Удмурт кылмы медаз быры, мед улоз. Анай-атайёс но семьяязы нылпиосынызы удмурт кылын мед вераськысалзы вылэм. Ми, арлыдоос, вань дыръя анай кылмы улоз ай. Нош собере? Кыл ке быриз, калыкмы но быроз угось, - сюлэмшугъяськонзэ шараям Анастасия Романовна.

Азьло Купченей школаын удмурт кылэз дышетӥллямтэ. Школалэсь выль юртсэ ӝутонэ трос кужымзэ понэм, 15 ар ӵоже школаен кивалтэм, али дыре физикаез но математикаез нуись арлыдо дышетӥсьлэн Николай Константиновлэн кылъёсызъя, школаязы анай кылэз дышетон вылысь, трос сюлмаськоно луэм.

- Удмурт кылъя но литературая урокъёсты нуыны та ӧръя тодон-валан басьтэм дышетӥсьёс ӧй вал. Соин ик школаез йылпумъям нылъёсты – Люда сузэрме но Гуля Пургинаез (али Антонова) - УдГУ-э дышетскыны ыстоно кариськи. Целевой направление басьтыса, ачим соосты Ижевске нуи. Удмурт кылэз дышетымтэ нылъёслы грамматикаез дышетон туж секытэн ке но сётӥськиз, соос дышетсконзэс йылпумъязы, дипломъёс басьтӥзы. Со дырысен школаямы анай кылэз дышетыны кутскизы, - вера Николай Викторович. - Луэмзэ быдтыны капчи, нош выльзэ ӝутон туж секытэн сётӥське.

Кушнаренко ёросысь Канлы гуртын улӥсьёс но анай кылэз дышетонэн герӟаськем шуг-секытъёсын пумисько. Куке но татын бадӟым школа вылэм, удмурт пиналъёс вордскем кылзэс шумпотыса дышетӥллям, удмурт сямен вераськиллям. Нош туннэ нуналэ, дышетскисьёс ӧжыт луэмен, Канлыын школа пытсаськемын, нылпиос бускель гуртэ дышетскыны ветло. Кызьы пусъё дышетӥсьёс, удмурт кылъя но литературая урокъёслы часъёс кулэсмемын. Вордскем кылзы, калыксы но сям-йылолъёссы сярысь сюлмаськисьёс та пумысен кытын гинэ кылпум ӝутылӥллямтэ ни, нош йӧ интыысьтыз уг, пе, вырӟы.

Улон интыяз уг сылы. Выль технологиос, выль луонлыкъёс «вордӥсько», азьвыл кылдэмез узырме. Адями азе но улон юн куронъёссэ пуктэ. Котькин тодэ, туала улонэн артэ вамышъян понна, компьютерен ужаны быгатоно, одӥг ке но кунгож кылэз валано, вераськыны быгатоно. Кӧня кылэз тодӥд ке но, соос ог-огзылы уг люкето. Трос кылэз тодэм адямилы юрттэ гинэ.

Одӥг гужем нуналэ нылыным сиён-юонэн вузкарон юртын ветлӥськом. Вӧзам тодмо кышномурт лыктӥз но пелям каллен гинэ вера:

- Кин меда магазин тыр удмурт кылын вераське шуисько. Тӥ, иське. Нылыд удмурт кылэн вераське вылэм, уг но возьдаськы.

- Удмурт ныл ук со, малы уз вераськы, - шуисько паймыса шорам учкись тодмоелы.

- Молодец, - шуиз но тодмое магазинысь потон ӧс пала вамыштӥз.

Паймыса кыли. Кин ке но, оло, малпалоз ушъяськисько шуыса, но со озьы ӧвӧл. Мон данъяськисько. Дорын удмурт кылын вераськиськом. Бигер кылэз но ваньмы умой тодӥськом. Ӟуч кылэз дышетон сяна, нылы кыкетӥ классысен удмурт кылъя но литературая урокъёсы ветлэ. Туэ, витетӥ классэ потыса, со башкир кылэз но дышетыны кутскиз. Секыт шуыса уг ӝожтӥськы.

- Нылпи садэ ветлыку бигер кыллы дышеме умой луиз, башкир кылэз дышетон секыт ӧвӧл, соос ог-огзылы тупалогес, - шуэ со школаысь бертыса. – Произношение бордын гинэ ужано.

Пӧртэм кылын вераськыны быгатонлы котькыӵе вакытэ но вылӥ дунъет сётӥськем. «Кӧня кылэз тон тодӥськод, сомында тон адями», - шуылӥллям вашкала мудрецъёс. Кылсярысь, Ахметзаки Валиди, Мажит Гафури, анай кылзэс тодэм сяна, витьлэсь трос мукет кылъёсты тодӥллям. Кыл калыклэсь сямзэ, йылолъёссэ, культуразэ валаны юрттэ. Пифагор гожтэм: «Кыӵе ке калыклэсь сямзэ валамед потӥз ке, нырысь ик солэсь кылзэ дышетыны тыршы». Нош мукет кылъёсты дышетон понна, анай кылэз тодоно, сое вунэтоно ӧвӧл. Тодам лыктӥз Флор Васильевлэн «Родной кыл» кылбурез.

Кинлы кулэ на, пе, удмурт кылыд?!

Гуртад сяна,

Уд вераськы соин.

Сыӵе вераськонэз ке кылӥсько,

Котьку солы туж лек вожпотӥсько.

Анай кыл – улонэ нырысь вамыш,

Сотэк уд лэсьты мукетсэ вамыш.

Анай музэн,

Анай кылыд юрттоз,

Улон сюрес кузя йыгмыт валтоз.

Бадӟым шуръёс кошко ошмесысен,

Нош вераськон кутске

Анай кылэн.

Умой ӧд ке вала анай кылэз,

Ӟечгес уд тоды тон мукет кылэз.

Соин ик мон

Тыныд йыбырттӥсько,

Соин ик мон

Тонэн данъяськисько.