Сяськаос ки улаз чебер пушъё

Сяськаосты яратон сое вуттӥз али ужаз но: куинь ар ӵоже Уфаысь Черниковкаын Катя но солэн ужъя эшъёсыз чебересь клумбаос кылдытъяло, городын улӥсьёсты шумпотто. Екатерина Гандалифовна Черниковкаысь Благоустройствоя службалэн вож хозяйствоысьтыз рабочей лыдъяське. Вордӥськемын со Казахстанын, но быдэ вуиз Татышлы ёросысь Уразгильды гуртын. Уфае улыны интыяськем бераз Катя пӧртэм ужъёсты «веръяз», но мылкыдыз мукетсэ куре вал. Озьы со ландшафтной дизайнъя курсъёсы мынӥз.

42 аресъем кышномуртлэн 24 но 19 аресъем пиосыз ни. Кызьы со соосты пыд йылазы султытӥз, дышетӥз, ачиз гинэ тодэ. Со сярысь вераськыны туж уг но яраты. Пиосыз понна со котькыӵе секытлыкез  вормоз, котьмае лэсьтоз, быгатоз.  Нош сяськаосты яратонэз котьку солэсь мылкыдзэ ӝутэ вал. Али со – шудо кышномурт: пиосыз но будӥзы ни, яратоно кузпалыз но вань, кудӥз Благоустройствоя службаын ик водитель луыса ужа.
- Сяськаос, адямиос кадь. Соос шӧдо яратэмез, - шуэ Катя. – Соос умой будо, киыд капчи, биополеед умой ке. Нош толэзь календарья будосъёсты мерттон – со огшоры веран кадь потэ. Троицае музъемез йӧтылыны уг яра шуо. Соиз шонер. Ас вылам шӧдӥ.

Орджоникидзе ёрослэн стелаез дорысь клумбаосты кин адӟиз, со – Катялэн но солэн эшъёсызлэн ужзы. Туэ татчы нырысьсэ лемлет тусо гортензиос мерттӥзы. Соос сяськаяны кутскизы ни, татӥ ветлӥсьёсты сӥзьылозь чеберенызы шумпоттозы. Нош 18-тӥ номеро больница вӧзысь клумбаез тӧдьы гортензиос шулдырто.
— Гортензиосты огпол мерттӥськод но, сезонысь сезонэ соос чебергес но чебергес луозы, - валэктэ Екатерина. – Бархатцыосты но георгинъёсты выльысь мерттоно луэ.

Туэ кыкетӥзэ вордскиз шуыны луэ кык урам куспысь – Кольцевой но Машиностоительёслэн – сяська гурезь. Соин Екатериналэн шуныт тодэ ваёнъёсыз герӟаськемын: пичи пиезлы Кириллы арес дыръяз соос отчы сяськаослы ву киськаны ветлылӥзы.  Пиез кемалась будӥз ни, нош азьвыл сяськаос интые жаг будэ шуыса, Катялэн сюлмыз шуг вал. Луонлык кылдӥз но, кышномурт татчы нош лыктӥз, пӧртэм тусо петуниос мерттӥз.
- Та инты вӧзтӥ ортчыкум, куддыръя эскерыны потасько, ваньмыз умой-а шуыса учкыны, - люкиське со. – Нош кыӵе воже потэ, адӟисько ке, сяськаостыя лушкало шуыса.

 Безденежныхъёслэн семьязы Максимовка микрорайонын асьсэ корказы улэ. Садазы бадӟым инты висъямын розаослы. Кезьытъёс но луыло ке но куддыръя, Екатериналэн сяськаосыз лымшор палан кадь ик, кузёзылы соосты яратыса утемез понна  тулысысен бер сӥзьылозь чебересь сяськаосынызы  пунэмзэ берыкто. Ужез яратыса, ас азяд пуктэм малпанъёсыз быдэстыны тыршыса будэтэмзы понна Екатерина Гандалифовна тау кылъёссэ вера Анфиса анкаезлы но Виктор атаезлы. Мылкыдызлы кельшись ӧнерын тыршемез, дораз улӥсьёсты но чебер сяськаос пӧлын возем потэмез ас емышъёссэ сётэ. Котьмае лэсьтон азьын со творческой мылкыдзэ ужатэ. Кылсярысь, алигес солэн дизайнэзъя мунчо ӝутӥзы.