Мылкыд борды быгатэм кулэ

Эмилия паймымон чебер керттӥське. Тужгес яратэ курико венен небыт шудонъёс керттыны. Кыӵе гинэ пӧйшуръёсыз, тылобурдоосыз, нымы-кибыосыз ӧвӧл солэн: ыж, пуны, скал, пужей, муш, ыгы, попугай но мукет. Крючокен керттэм, кагазлэсь оригами но мукет амалъёсын лэсьтэм сяськаосыз но трос. Кибашлы нылашлы керттӥськыны, чильпаськыны ӵем дыръя интернет юрттэ.

Эмилияез крючокен вырыны песянаез нырысь дышетэм. «Али асме дышетэ ни, - шуэ Фаина апай. – Апайёсыз, Эвелинаен Милена но, Оксана кенэ но керттӥськыны быгато. Но огзылэн но Эмилиялэн кадь уг пӧрмы». Фаина апай та киужлы Свердловск улосвылысь торф поттон интые коньдон люканы мыныса, отын дышетскем. «Шутэтскон нуналъёсы эшъёсыным ӵошатскыса керттӥськиськом вал», - шуэ со. Мӧйы кышномурт синъёсызлы операция ке но лэсьтӥз, яратоно ужезлэсь уг палэнскы. Нош пӧртэм пужыоссэ кызьы лэсьтыны вунэтэ ке, солы Эмилия юрттэ.

Шагиахметовъёслэн корказы пӧртэм накидкаос, чебер миндэр пуйыос шулдырто. Киын лэсьтэм небыт шудонъёслэн но асьсэлэн интызы. Киужен вырисьёс ог-огзэс валало. Эмилиялы тунсыкъяськонъёссэ улоназ пыӵатыны анай-атайез, песянайез юртто. «Ошмес» газетэн радъям пӧртэм конкурсъёсысь но Эмилиялэсь ужъёссэ адӟыны луэ. Котьма ласянь усточи нылаш пӧраськыны но яратэ. Тортъёсыз тужгес чебер но ческыт пӧрмо. Быгатонлыкъёссэ азинтыны солэн мылкыдыз но дырыз тырме.

Материал но туспуктэм раедакцилэн архивысьтыз басьтэмын.