Сюрес вуттӥз Брангуртэ

Сюресэ Куеда станциысен кутскиз. Электричкаен Сарапулозь вуыса, вокзалысен ик газеле пукси. Тодмоосы пыр тоди, Сарапул-Ижевск сюрес вылысен Киясово воже васьконо но Бурановое ньыль иськем пыроно на. Бурановое-Киясово сюрес но бадӟым тракт луиз: машинаос выж-важ! гинэ ветло.

Пыдын вамыштӥ, пумен котырез учкылӥсько. Кӧня ке мынэм бере гурт адскиз. Эх, кыдёкын ик вылымтэ Брангуртсы шуыса, пыдъёсы эшшо но чаляк мыныны кутскизы. Но со синпӧет гинэ вылэм. Гурезь йылысен Бураново кырым пыдэсын кадь адске ке но, гуртэ пырытозь жади, пыдъёсы но ӵемтылыны кутскизы, тыбырысьтым рюкзаке но секытгес луыны ӧдъяз.

Нырысетӥ урам – Аптечная. Татысен кутскиз вань дуннелы тодмо Брангуртэн тодматсконэ. Кунокуа кышное Школьной ульчаын улэ. Иське, кык этажъем школа ӵапак со урамын луыны кулэ. Нош кызьы отчы потоно – валантэм. Мынон-мынон сямен пыр потонтэм урамлэн пумаз но вуи, нюк вамен но потӥ, кулэ ульчаям ӧй на вуы. Сюресэз юасалыд, урамъёсын ветлӥсьёсыз ик ӧвӧл. Кӧня ке дыр ортчыса, Центральной ураме вуи. Отысь удмурт сямен вераськись кык кышномуртъёсты пумитай. Соос валэктӥзы: мынам пыроно коркае культура юрт но школа вискын.

Та гуртын 600 пала улӥсьёсыз. Урамъёссы трос – ваньмыз дас куинь. Ӝыт Зоя эшеным со урамъёс кузя поръям, гуртын улӥсьёс сярысь трос тунсыкозэ тодӥ. Культура юртсы, школазы, выль черксы сяна, Бурановоын вӧсяськон юртсы вань на. Черк вӧзы али пересьёслы юрт ӝутӥське. Гурт Удмуртилэн шоркарезлы – Ижевсклы – кыдёкын ик ӧвӧл бере, татын улӥсьёс тросэз городэ ветлыса ужало. Татысь коркаосты дачалы но басьтыло, пе.

Паймымон, Бурановоын - ньыль музей! Нырысь ик, ас дораз интерьерной музей лэсьтэм Зоя Лебедева. Та корка солы песятаезлэсь – ньыль Георгиевской крестъёслэн кавалерзылэсь - кылемын. Пӧртэм сямен но пӧртэм интыосысь вуылэм антикварной арбериосты тылпу ньылӥз ке но, корка кузё юртсэ выльысен тупатӥз, музеяз экспонатъёс люказ.

Кылем даурысь мебель, куэм дӥськутъёс, тусьты-пуньы, суредъёс. Ачиз сяна, Зоя Михайловналэн анаез, биологияя дышетӥсь но, туж чебер суредаське вылэм. Музейлэн борддоръёсысьтыз соосты но адӟыны луэ.

Кык этажъем корка басьтыса, сое выльдыса, Брангуртэ войлоклэсь но текстильлэсь музей-галереязэ усьтэм Александр Пилин. Со но художник. Жаляса верано, музей ремонтэ ворсамын вал, кузёосыныз гинэ пумиським. Брангуртын ул5сьёслэн верамзыя, таиз музей кематэк ворсаськоз. Брангурт песянайёслэн но культура юртын асьсэлэн сэрегзы вань. Отчы тодмо кырӟась песянайёслэн пӧртэм интыосысь ваем наградаоссы но кузьымъёссы, удмурт дӥськут но гуртын кутӥськон арбериос люкамын. Ньылетӥез музей Григорий Верещагинлы сӥземын. 1900-тӥ арын сое Бурановской земской училищее ужаны лэзё. Со ужан вакыт школаын нырысьсэ библиотека кылдэ. 2001-тӥ арын Бураново шор ёзо школалы Г.Е. Верещагинлэсь нимзэ сёто. Музейен али кивалтэ Юлия Туктарева. Та фамилия но тросэзлы тодмо, дыр, "Брангуртысь песяйёс" коллективлэн кивалтӥсезъя Ольга Туктарева пыр. Юлия - солэн нылыз.

Одӥг нунал куспын та дано гуртысь ваньзэ адӟыса вуттыны ӧз луы. Тодӥсько, мылкыды та гуртэ нош куриськоз на. Удмурт пужыосын чеберъям автобус дугдылон интые потыса, сюресме Ижевске азьланьтӥ.

Туспуктэм интернетысь басьтэмын.