+17 °С
Салкым
Антитеррор
Вань иворъёс
Общие статьи
24 ноябрь 2019, 10:30

Вите со анайзэ

Верос

Куазь ӝомо-югдо вал ни. Вылаз ик, кезьытгес но кариськиз. Магазинме ворсай но дыртыса вамыштӥ дор палам. Ӟукыр-ӟукыр! шуккиське урам кузя гын сапегъёс улэ пачкам лымылэн бӧрдэмез. Почта ящик вӧзтӥ ортчыкум синйылтӥ пеймыт вужерез. Матэгес кариськи. Адӟисько, ящик доры пыдчиньыяськыса сузьтӥськыны выре пичи нылаш. Гожтэтсэ куштыны выронъяз, монэ со кылэм-адӟем ик ӧз кары. Йырысьтыз тӧдьы мамык кышетэз ик гылӟем ни. Кечат пальтоезъя тодмай ӵош дышетскем эшелэсь нылзэ Людаез.
- Вай, нылы, юртто, - ӧй чида ни курадӟемзэ учкыны.
Люда мон пала берытскиз но киоссэ ӝогак мышказ ватӥз. Гожтэтсэ талалозы кожаз, лэся. Кышкаса но дӥсьтытэк шорам учкизы сьӧд синъёс. Токыль-токыль бамъёсыз кузя синкылиос васько. Монэ тодмамез бере, нылашлэн ымдуръёсаз пальпотон воректӥз. Эбылям киыныз мычиз ньыль полэс куасалтэм бумагаез.
- Map та таӵe?
- Мамаелы гожтэт.
- Гожтэт?
Бен, со вал пичи муртлэн гожтэтэз. Конверттэк, нокыӵе букваостэк. Тӧдьы бумага вылын суредамын корка, нош со вӧзын сылэ пичи ныл.
Паймемме шӧдыса, лэся, нылаш валэктыны дыртӥз:
- Песянай гожъя, нош мамае уг берты. Уг вуо, дыр, дораз гожтэтъёсыз.
Собере данъяськыса кадь будэтӥз на: «Со ведь туж кыдёкын улэ, Северын».
- Бен, кыдёке кошкиз мамаед. Нош ас поннам малпай: «Пегӟиз, нылы, мумид. Мултэс луиз уго солы «пельтосысь» шедьтэм нуныез. Толэзь ортчиз-а, ӧз-а вордскемез бере, Валяез «тӧлпериос» нош ик городэ нуыса кошкизы. Отын сое ӝог кыскем ас бордаз мӧйыгес воргорон. Тон но кулэ ӧд луы ни, песянаен-песятаедлы кузьмаса кельтӥз. Солы угось аслэсьтыз улонзэ радъяны кулэ вал…»
Нош Люда вера но вера мумиз сярысь…
- Таня апай, тодӥськоды-а, мынам мамае кыӵе чебер? Киноысь артистъёс кадь ик. Бадӟым-бадӟым фотографиез синучкон доры ошемын. Песянае шуэ, мон быдэсак солы кельшисько. Синъёсы но, йырсие но. Шорам учкыса, пе, мамаеным адӟиськем кадь потӥсько. Весь ӟыгыръя, чупа.
Людалэн мадемезъя, мынам пушкы пумен вожпотонэн но, паймонэн но пачылме: «Мар анай сюлэм со? Куать ар ӵоже одӥг пол но ӧз адӟиськы! Ышиз-быриз».
- Песятай нош куаретэ, - нылашлэн куараез огдырлы но уг чалмылы. – Одӥг тӧлсяськаен ӧз тырмы на-а, кыкетӥзэ будэтӥськод!
Собере шуак мыным вазиськиз:
- Таня апай, нош мар со «тӧлсяська»?
Мон могак луи. Ымнырам вир ик пальккиськиз. Ярам коть, Люда сое пеймытэн ӧз шӧды.
- «Тӧлсяська» - со… со куке чебер сяськаез тӧл кыдёке, кыдёке нуыса кошке.
- Хо, кызьы, пе, тӧл монэ нуоз ай. Мон ведь бадӟым ни. Интыысьтым но вырӟытэмез уз луы, - йӧн-йӧн кариськиз Люда.
- Тӧл нуыны уз быгаты, нош Тол бабай тонэ ӟыгыръям ни кадь. Уть ай, чиньыосыд но ӟонгыраллям ни. Песянаен-песятаед но кынтоссэс ыштӥзы, дыр. Озьы-а?
Каньылля гинэ нылашез ӟыгыртӥ но, со вань мугорыныз бордам кыстӥськиз. Кӧня ке озьы сылэммы бере вази ни:
- Я, нылы, бызь ини гуртад, нош гожтэттэ мон ачим ысто.
Кема ӵоже йырысьтым ӧз поты та пумиськон. Эх, Люда, Люда. Кыӵе возьма со мемизэ. Ялан вите шунытэсь, небытэсь киосыныз маяллямзэ-вешамзэ. Пинал сюлэм весь оске: тани мамаез кыдёкысь ужъёссэ лэсьтоз но, сое ас дораз улыны басьтоз. Песянаез но озьы шуэ ук…
Нылаш ӝоген кияз портфель кутоз ни. Дышетскоз лыдъяськыны, гожъяськыны. Гожтэтъёс но мукет сямен гожъялоз. Нош луоз на-а меда соос пӧлын анаезлы гожтэмез?
Лия МАЛЫХ.
Читайте нас: