Чечыез шӧдэм дуринчи

Берло дыре коррупциен герӟаськем иворъёсты ӵем кылоно луиськом. Сыӵе амалэн йыртэмасьёсын вылӥ кивалтэт зол нюръяське ке но, югдур сокем уг воштӥськы: муртлэсь ваньбурзэ кисыязы понӥсьёс вань. Башкортостанысь прокуратуралэн сайтысьтыз иворъёсты эскероно ке, коррупция туннэ нуналэ котькыӵе удысын пумиське. Баймак ёросысь прокуратура, кылсярысь, та нуналъёсы сельскохозяйственной потребительской кооперативен кивалтӥсьлы пумит уголовной ужлы йылпумъян лэсьтӥз: кивалтӥсь «мошенничество» но «неправомерный оборот средств платежей» статьяосъя кыл кутоз.

Республикаысь прокуратуралэн пресс-службаезлэн ивортэмезъя, кивалтӥсь 2020-2023-тӥ аръёсы «Малое и среднее предпринимательство и поддержка индивидуальной предпринимательской инициативы» нацпроект улсын регионысь минсельхозэ субсидия басьтон сярысь заявкаос лэзем. Документъёсаз пӧяськыса пусъем, калыклэсь продукция басьтэм шуыса. Озьы сельхозкооператив 676 сюрс манет тыр субсидия басьтэм. Кивалтӥсь пӧяськеменыз республикаысь Гурт хозяйствоя министерстволы ыштонъёс ваем.

Кивалтӥсь аслэсьтыз янгышсэ валам. Уголовной уж Баймак ёросысь судэ ыстэмын.

Фото:Ксения Калинина