Тау тӥледлы!

Кыниды синъёстэс, ож лудэ пограса,
Аныкай-атыкай музъемдэс утьыса.
«Ивортэк быремын…» ӝож ивор роднядэ
Куасалтӥз, погыртӥз, жалятэк, та вие.
Вордӥськем гуртады чик ӧвӧл шайгуды,
Яркыт тыл гинэ весь нимъёстэс югдытэ.
Нош батыр мугорды кытын ке кыдёкын…
Оло нош ватэмын… Оло нош ватымтэ…
Бусыос ю-нянен вазь сӥзьыл гыало,
Ӵуж куаръёс, бергаса, музъеме усьыло,
Ватыса весь мургес но мургес лыостэс,
Но уз ӵуше аръёс тӥлесьтыд нимъёстэс.
Атайды но, пиды но витиз бертэмдэс…
Кошкизы ни соос но сопал дуннее.
Ӝоген ми но кошком. Нош милям внукъёсмы
Кылёзы. Озьы ик тӥледыз сюлмазы возёзы.
Сюлмазы возёзы внукъёсмы, соослэн внукъёссы.
Дауръёс пыр улоз, уз, уз вуны нимды.
Нимъёстэс та югыт дуннее горд вирен
Гожтыса кельтӥды кысонтэм,
быронтэм,
вунонтэм.
Юг горд тыл уй-нунал кысытэк нош ялан ӝуа.
Котькуд ар та бергась музъеме вож тулыс вуылоз.
Та чебер тулысэз, турынэз, инбамез милемлы утиды,
Улондэс но лулдэс, жалятэк, ми понна сётӥды.
Тау тӥлед со понна! Тау тӥлед лул-сюлмысь,
Ож лудысь бертэмъёс но отчы пыраклы кылемъёс.
Тау тыныд, песятай! Тау тыныд!
Тау Быдӟым Вормонлы но шудо, шундыё улонлы.
Татьяна ХАРИСОВА.
Пермь шаерысь Чернушка ёросысь Бадӟым Березник гурт.