Секыт ож дыръёсты тодэ вайыса

Вордӥськи мон 1942 арын, Вильгуртын. Семьяямы 3 кузя будӥмы: агай, мон но сузэрмы. Ожмаськон кутскем бере, аткайме фронтэ келязы.

Гуртамы одӥг но йӧно воргоронъёс ӧз кыле, инвалидъёс но секыт висисьёс гинэ. Тросэз пиосмурт ужъёс усизы нылкышноослэн пельпум вылазы: ӵукнаысен, 5 часысен, потозы вал ини соос бусые, пичи нылпиоссэс сьӧразы басьтыса, но ужалозы вал бер ӝытозь. Анкае мынам, Пелагея Гильфановна, эмъясь луыса ужаз - ӵукнаысен ӝытозь арасьёсты эмъялляз, озьы ке но, ӵем гинэ уйин дорамы лыктыса, анкайме нуо вал висисьёс доры.

Номырин ӵошатонтэм сюма вал кӧтмы. Гужем инкуазь сюдэ вал милемыз кыркушманэн, вольытгумыен, гоночысноен, чырстурынэн, мульыен, губиен, узы-борыен. Югдурлэсь секытсэ валаса, оло, инкуазь но далтытъяз аслэсьтыз емышъёссэ. Кӧтмы сюмалляку, ми пӧраллямы «пельняньёс»: узыез беризь куар пушкы биньыса сиылим. Ческыт вал, кӧт тырымон.

Ож бырем бере но воргоронъёс соку ик ӧз бертэ: соос жугиськем бервылъёссэс октылыса но интыяса кельтӥзы. Аткае, Рафик Камидуллович, улэпен бертыса, колхозлэн председателез луыса ужаз. Сталинградэз тушмонъёс кие сюремлэсь утиз. Куинь пол кыллем госпитальын. Киысьтыз куэныз ӵош ошиськем гильзазэ ӵем возьматъялоз вал милемлы, «Тани, нылы, немецъёслэн кузьымзы» шуыса.

Тросэз воргоронъёс ӧз бертэ гуртамы, пыраклы люкиськизы доръёссылэсь. «Пропал без вести» шуэм гожтэтъёс трос гинэ сюлэмъёсты чигизы: кӧня анайёс уйёссэс бӧрдылыса потӥзы, озьы ке но, оскылӥзы, бертозы, одно ик бертыса вуозы шуыса.

Таче югдур кылдӥз мынам ӵужанкаеным но. Ӵужмуртэ ожысь ӧз берты, «без вести пропал» шуизы. Нош ӵужанкай возьмаз, уй но нунал но сое возьмаз. Ми доры куное лыктыкуз, ӧжыт пукыса, соку ик бертыны потоз вал, «Амерӟанэ бертыса вуоз, нош мон дорын ӧвӧл» шуылӥз. 86 аресэз дорозь возьмаз, нош пиез ӧз берты. Кулон азяз гинэ берпуметӥзэ синзэ усьтыкуз, кеськиз: «Адӟиды-а? Бертӥз ук, бертӥз!»…

Таӵе тодэ ваёнъёссэ мадиз мыным песянай. Тани, 75 ар ортчиз ини ож дугдэм дырысен, озьы ке но, кышкыт курадӟонъёсын тырмем тодэ ваёнъёс али ке но уло милям сюлэмъёсамы. Трос гинэ лулъёсты быдтӥз со ож. Ноку но уз вунэ солдатъёс, кудъёсыз кышкатэк но дугдытэк жугиськизы урмем сьӧсьёсын. Бадӟым дан тӥледлы, мусо песятайёс, милемлы таӵе улон кузьмамды понна. Ми тӥ понна тыршомы та кузьмам улонамы ӟеч ужъёс лэсьтыны, кудъёсыз азьпалан будӥсь пиналъёслы шудо тодэ ваёнъёс гинэ вайыны быгатозы.

Фотоын Рафик Камидуллович Камидуллин.