Быдӟым Атыкай ож сюрестӥ атае но вамышъяз

Мынам атае Муллай Баймиевич Баймиев но тушмонъёсын ожмаськем. Со 1994-тӥ арын улонысь кошкиз. Атай войнаын ветлэмез сярысь вераны ӧз яраты, вормонлы сӥзем ӧтчамъёсы но туж шер поталляз. 1986-тӥ арын, Шаермес утисьёслэн праздниксы азьын, атайлэсь тодэ ваёнъёссэ внукез Алексей Баймиев классысьтыз эшеныз Эдуард Рахимзяновен ӵош магнитофонэ гожтӥзы. Соку соос Бигинейысь шор ёзо школаын 9-тӥ классын дышетско вал.
Атайлэсь войнаын ветлэмзэ мон кык фронтовикъёслэн вераськемысьтызы но тодӥсько на. Кенаклэн, Надежда Баймиевалэн, атаез Куеда ёросысь Гожан гуртысь Зиянтимир Исаков вал. Со Улысь Балтаче вуылыкуз котьку ми доры пыралляз. «Мынам кудоен, фронтовикен, вераськем потэ ай», - шуылӥз со. Зиянтимир Исаков но война пыр ортчем. Со колхозын шофёр луыса ужам, машинаеныз фронтэ кошкем. «Войнаын кык машинаме ӝуатӥзы. Берлин дорозь вуи. Рейхстагез басьтэмзы бере сое адӟыны мынӥм, соку отчы мон но аслэсьтым нимме гожтыса кельтӥ», - вераз З. Исаков. Огпол вераськыкузы атай шуиз: «Войнаын адямилэн улонэз чибиньлэн улонэзлэсь но дунтэмгес». Солэн синкылиосыз потӥзы, веранзэ азинтыны ӧз быгаты ни. Соку анай солы стопкаен вина сётӥз. Юэм бераз шуиз: «Табере вера». Атай мадьыны кутскиз: «Бой мынымтэ дыръя одӥг эшеным вераськыса сылӥськом вал. Кытысь дыр снаряд усиз. Эше ӧвӧллы потӥз. Пужым вайын шинелез гинэ лошъяське на вал. Со снаряд пуштыку мон пограй гинэ. Монэ ранить ӧз кары. Эшелэсь номырзэ ӧм шедьтэ ни. Адями кытчы дыр пыриз». Тодӥсько на атайлэсь тазьы верамзэ но: «Адями войналы дыше-а, дыр, солэсь вормонтэм жаде-а, дыр. Таиз учыр Венгриысь одӥгаз городын луиз. Одӥг комнатае пыри но, укно доры пуконъёсты пуктылыса, шутэтскыны выдӥ. Соку ик умме усиськем. Шуак сайкай но пайми: мон вылын штукатурка юдэсъёс, укно пиялалэн пырыосыз кыллё. Укно ӧвӧл ни. Самолётъёс бомбить карыса кошкиллям. Мон бомбаослэсь пуштэмзэс но кылӥськымтэ». Та учыръёсыз сярысь мадьыкуз, война быремлы дас арлэсь ятыр ӧй вал, дыр.

(Материаллэсь быдэс текстсэ газетлэн 19-20-тӥ номеръёсысьтыз лыдӟыны быгатоды).