-16 °С
Салкым
Антитеррор
Вань иворъёс
Быдӟым Вормон
11 южтолэзь 2020, 14:00

"Дауръёслы улэпесь удмуртъёс"

Тазьы нимаське писательлэн-документалистлэн Николай Кузнецовлэн выль книгаез. Тае удмурт калыклэн ожгар энциклопедиез шуыны луэ. Со удмурт кылын удмурт геройёс сярысь.

Книгалэн азькылаз туж тунсыко лыдпусъёс сётэмын: быдӟым ожмаськонэ пыриськем удмуртъёслэн 19640 наградной листъёссы. Озьыен, сомында медальёс но орденъёс сётэмын. Соос пӧлын: 10 Совето Союзысь Геройёс, 6 – куинь степенё Слава орденъёсын пусъемъёс, 7 – Ленин орденэн данъямъёс, 60 – Александр Невский орденлэн кавалеръёсыз, 6 – Суворов но Кутузов нимо орден басьтэмъёс, ог 300 – Горд Знамя орденэн дунъямъёс.
Валамон ни, ожгар орденъёс басьтӥсьёс пӧлын Башкортостанысь удмуртъёс но вал. Совето Союзлэсь Геройзэ Ульмас Шакировез тӥ ваньды тодӥськоды. Книгаын со сярысь нимысьтыз статья вань.
Книгалэн «Удмурт шаерлэн палэназ вордскемъёс» люкетаз Башкириысь 16 удмурт воргоронъёс пыртэмын. Соос – «За отвагу», «За боевые заслуги» медальёсын, пӧртэм ожгар орденъёсын пусъемъёс. Бурай ёросысь пыремын Валентин Галямшин, Калтасы ёросысь – Галиаскар Валишин (Роман Валишин писательлэн атаез), Шарафи Назмутдинов, Татышлы ёросысь – Шарип Валинуров, Биктимир Галямшин, Задикан Гарифуллин, Шарифулла Гарифьянов, Садрислам Шайхисламов, Янаул ёросысь – Николай Ахметзянов, Валиахмат Галямшин, Григорий Захаров, Армагин Марданов, Гарибзян Петрофанов, Шариф Саитов, Гарафи Файзуллин, Мулланур Шайморданов. Таос пӧлысь кин ке одӥг медален гинэ данъямын, кӧня ке орденъёсын, медальёсын пусъемъёс но вань. Кылсярысь, Янаул ёросысь Улысь Кирга гуртысь Валиахмет Галямшинлы Горд Кизили, куинетӥ но кыкетӥ степенё Слава орденъёс, «За отвагу» медаль сётэмын. Кык Слава но Горд Кизили орденъёсын озьы ик пусъемын Татышлы ёросысь Улысь Балтач гуртысь Шарифулла Гарифьянов. Янаул ёросысь Каймашабаш гуртысь Гарибзян Петрофанов ож лудысь сӧсырмем ог 50 солдатъёсты поттӥз но кулонлэсь утиз, со кык Слава орденъёсын но «За отвагу», «За боевые заслуги» медальёсын данъямын.
Вылӥ наградаосын пусъем асьме палась удмуртъёс пӧлысь книгае пырымтэос но кылизы, дыр. Тани мынам варматае (кышноелэн атаез) Янаул ёросысь Максим гуртысь Гализян Нариманов 1945-тӥ арын «За боевые заслуги» медален данъямын. Нимыз книгаын ӧвӧл. Мугез валамон: наградной листаз (интернетысь шедьтӥ) сое бигер шуыса пусйиллям. Та выллем учыръёс луыны быгатозы.
Книгаын вань «Удмурт писательёс но поэтъёс. Быдӟым Атыкай ожмаськон. Тодэ ваёнъёс но малпанъёс» люкетэз. Татчы пыртэмын туала удмурт журналистъёслэн, писательёслэн ожгарчиос сярысь гожтэмъёссы но. Мынам но «Танып вуэд вия но бон…» нимо гожтэтэ печатламын. Со сӥземын войнаын ивортэк ышем Ахметдин Бадретдинов песятаелы.
Быдӟым Вормонэз уно миллион солдатъёс, гуртъёсын но каръёсын тыршем адямиос ваизы. Ваньмызлэсь нимъёссэс книгаосы пыртыса но уд быдты.
Н. Кузнецовлэн дасям книгаезлэн кулэлыкез туж бадӟым. Со умой возьматэ: удмуртъёс но Дорзэс тушмонлэсь утён понна кышкатэк геройлыко ожмаськизы. Геройёсмес асьмеос вунэтыны кулэ ӧвӧл.
Ульфат Бадретдинов.
Ижкар.
Читайте нас в