-3 °С
Лымы
Вань иворъёс
Буре ваён но данъян ар
9 декабрь 2020, 17:25
Героен-дышетӥсен пумиськон
Алтаево школаын дышетскыкум, мыным вунонтэм кылиз «Славные сыны Башкирии» книгаез лыдњеме. Совето Союзлэн Геройёсыз сярысь со. Книгаысь геройёс пӧлысь одӥгезлэсь фамилизэ но нимзэ, бускель ёросысь но удмурт гуртысь луэмысьтыз, блокнотам ик пусйыса кельтӥ: «Ульмас Шакирович Шакиров. 1922-тӥ арын Балтач ёросысь Асавка гуртын вордӥськемын. Али школаын ужа». «Удмурт дышетӥсь-герой. Кыӵе меда со? Пумиськоно вылэм удмурт героен», – малпай мон соку. Со дырысен ог дас кык ар ортчем бере Ижевскысен мыным Ульмас Шакировен пумиськыны шуд усиз. Геройлэсь интервью но басьтӥ. Гожтэме «Советской Удмуртия» газетын потӥз. Со 1983-тӥ арын вал. Статьяысьтым одӥг люкетэныз тодматскыны дэмласько.
Апрель толэзьлэн пумаз Ижевскысь 73-тӥ номеро но Завьял ёросысь Первомайский школаосы Совето Союзлэн дас одӥг Геройёсыз ветлӥзы. Пиналъёс доры лыктӥзы А. А. Девятьяров, И. В. Клевцов, В. Н. Сабуров но мукетъёсыз ожысь дано ветеранъёс. Ульмас Шакирович Шакировез но отчы ӧтиллям.
«Пумиськоно вылэм удмурт героен», – пичи дырысьтым малпанэ выльысь улњиз кадь. 22 апреле, В. И. Ленинлэн вордӥськем нуналаз, «Ижевск» гостиницаын малпанэ быдэсмиз. Тани ми Владислав Кириллов эшеным пукиськом Ульмас Шакировичен артэ. Книгаысь туспуктэмъя мон сое егит тусо кожасько вал. Нош аръёс, ожъёсын басьтэм ранаосыз пытьыоссэс кельтӥллям ни: бамаз муресь кисыриос кылдӥллям, йырсиосыз но пурысьтаны кутскиллям.
Юанъёсылы со вераны уг дырты, мур малпаськонэ усе. Ымныр шораз учкыса валано: У. Ш. Шакиров сюлэмшугъяське. Со выльысь син азяз пуктыны турттэ, вылды, ож бусые весяклы кылем эшъёссэ, тодаз вае, луоз, егит дырзэ.
… Дас тямыс арес тырмиз Ульмас Шакировлы война кутскон аре. Служить карыны сое нырысь ик лэзизы Тихоокеанской флотэ. Тушмон Москва пала матэктыку, У. Шакировез но мукет морской пехотинецъёсты шоркармес утьыны ыстӥзы.
– «Россия бадӟым, нош некытчы чигнаны, сьӧрамы Москва!» – Клочков политруклэсь верам кылъёссэ со вакытэ тодӥсьтэмез ӧй вал, – маде Ульмас Шакирович. – Столицамы понна туж трос советской солдатъёс улонзэс сётӥзы. Нош тушмонлы Москваез киултыны ӧз кылды.
У. Ш. Шакиров но шоркармы понна кужымзэ жалятэк ожмаськиз. Тушмон пуляос сое куинь пол сӧсыртӥзы, озьы ке но солдат кулонлы ӧз сётскы, выльысь пыд вылаз султылӥз.
Одӥг пол У. Шакиров мукет солдатъёсын ӵош котыртэме сюриз. Киыз но пыдыз сӧырмемын. Интыысьтыз вырӟыны но уг быгаты ни. Декабрь толэзь. Кезьыт. Санитаръёс ӧвӧл. Ульмасэз эшъёсыз кыз лысъёсын шобыртӥзы, асьсэос котыртэмысь потыны сюрес утчало, тушмонлэн омырскемзылы пезьдэт сётыны дасясько.
– Кынмыны кутски. Мар кароно? Одӥг интыын улыса, чонгыралод но кулод. Азьпала нюжтӥськоно. Озьы ӧжыт ке но шуналод но, – вера Ульмас Шакирович. – Лымы вылтӥ, куакъёс пӧлтӥ мырдэм но кызьы нюжтӥськыса потӥ сюрес вылэ. Отысен монэ эшъёсы адӟизы но ӝуам немец танк пушкы пыртӥзы. Отын сизьым кузя мон кадь ик сӧсырмем солдатъёс вылӥллям ни. Одӥг арня со танкын тямыс кузя улӥм. Сиён ӧвӧл, тылскыны уг яра.Ӵынэз адӟыса, тушмон самолётъёс соку ик бомбаос куяны кутскозы. Мар ватонэз, сизьым нунал ӵоже ми кулэм валлэсь сӥльзэ ыль куен сиёно луим.
У. Ш. Шакиров огвакытлы чалмиз, мур шокчиз, собере веранзэ азьланьтӥз: «Озьы ке но тушмонлы ӧм сётӥське, котыртэмысь потӥм».
Ульмас Шакировлы 1944-тӥ ар вунонтэм кылиз. Со аре солдатэз коммунистъёс асьсэ радазы пыртӥзы. Бӧрысьгес Ульмас Шакировичлы взводэн кивалтыны оскизы. Со арын 21-тӥ июне старшой сержантлы У. Шакировлы командование Витебск палась Шумилино станциез тушмонлэсь мозмытыны приказ сётӥз.
Фашистъёс со станцие туж юн «каръяськиллям» вылэм. Трос кужымзэс отчы люкаллям. Ожмаськон ӟырдыт вал. У. Шакировлэн взводэз Шумилиноез мозмытӥз, но ньыльдон содатъёс пӧлысь тямысэз гинэ улэп кылизы.
Ульмас Шакиров улэп кылем эшъёсыныз Западная Двина шурез выжизы. Ярдурысен соос немец разведчикъёс вылэ кемдӥзы. Ожмаськон кема ӧз кыстӥськы. Фашистъёс пазьгемын вал, куать асьме солдатъёс но быризы. Старшой сержант У. Шакиров эшеныз џош дас немец солдатъёсты но кык офицеръёсты пленэ басьтӥзы.
Та подвигез понна Ульмас Шакировлы Совето Союзысь Герой ним сётэмын…
Война бере Ульмас Шакирович улонзэ школаен герњаз. Куамын сизьыметӥ арзэ ни У. Ш. Шакиров вордӥськем Асавка гуртаз нылпиосты зэмос кивоштӥсьёс мед луозы шуыса сюлмаське. Соослы уже яратон мылкыд пыџатэ. Дышетӥсьлэн аслаз нылпиосыз но быдэ вуизы ни. Кыке пиосыз офицеръёс, Володя но Гриша пиосыз заводъёсын тыршо. Ралия нылыз атаезлэн сюрестӥз вамыштӥз – дышетӥсь луиз.
– Капчи ӧй вал мынам улонэ, – шуэ У. Ш. Шакиров. – Но асме шудоен лыдъясько – таза будо пиосы но нылы, соослэн но нылпиоссы вань ни. Школаын, нылпиос пќлын, мон егитомисько кадь, сюлмы шумпотонэн пачылме. Туала пиналъёс войнаез ноку медаз адӟе. Со понна вань калыкъёслы сюлмаськоно.
* * *
Ульмас Шакировичен кыкетӥзэ пумиськи Ижевскын 1996-тӥ арын инвожо (июнь) толэзе. Соку Удмуртилэн шорказ но Завьял ёросэ Башкортостанысь трос удмурт фольклор коллективъёс лыктӥзы, бадӟым концерт-пумиськонъёс радъязы. Соос пӧлын удмурт герой но вал. Соку туспуктэме но пуксим.
Совето Союзлэн Героез Ульмас Шакиров пӧламы ӧвӧл ни. Озьы ке но со улэп асьме тодэ ваёнъёсамы.
Читайте нас:
Учредитель: Агентство по печати и средствам массовой информации Республики Башкортостан
Регистрационный номер: Свидетельство ПИ № ТУ02-01536 от 6 июня 2016г.
Главный редактор: Нигаматуллина Оля Борисовна
Газета "Ошмес" - общественно-политическая, социальная, культурно-просветительская газета удмуртов Республики Башкортостан.
Телефон
Телефон+7 (34778) 2-11-89, 2-18-71
Электронная почта
Адрес
452830, Республика Башкортостан, Татышлинский район, с. Верхние Татышлы, ул. Ленина, д. 91