+26 °С
Салкым
Антитеррор
Вань иворъёс
Буре ваён но данъян ар
17 февраль 2020, 13:40

Афган ожлэн тылгизьыез милям гуртамы но вуиз

Вакыт. Адямилэн улоназ гинэ ӧвӧл, со шаермылэн историяз но аслэсьтыз пытьызэ кельтэ. Зэм, шудо минутъёс кемалы тодэ кылё. Кышкыт учыръёс, шуг-секытъёс но сюлэме яраос кылдыто.

Трос вакыт ке но ортчемын ни, ож аръёсты вунэтыны уг луы. Афган, чечен ожъёс но вунонтэм луо. Кӧня адямиослэн улонзы отын чигиськем. Афган ож укмыс ар, одӥг толэзь но 19 нунал кыстӥськем. Солэн тылгизьыез Канлые но вуиз.
Милям гуртысьтымы Анатолий Кисамов афган оже пыриськем. Жаляса верано, отын егит солдатлэн улонэз чигем. Анатолий Фарвазетдинович кулэм бераз Горд кизили орденэн, «Воину-интернационалисту от благодарного афганского народа» медален пусъемын.
Канлы гуртын вордскем Анатолий Кисамовез дас тямысэз тырмем бере, 1981-тӥ арын 2-тӥ куартолэзе, шаермес утисьёслэн радазы басьтӥзы. Со СССР-ысь КГБ-лэн пограничной войскоосаз шедиз. Егит солдат Герат провинциысь Гульран уездысь Карабаг кишлакын резервной мотоманёвренной группаын старший техниклэсь ужзэ нуэм, боевой операциосы пыриськем, рейдъёсы потам. 1983-тӥ арын 8-тӥ толшоре резервной мотоманёвренной группаысь солдатъёс засадае шедиллям. Анатолий но соос пӧлын вылэм. Тушмон пуля нокинэ жалямтэ. Соку гуртомылэн сюлмыз шуккемысь дугдэм. Егит солдатлы куинь нуналскын 20 арес тырмысал...
Афган ож трос семьяослы вормонтэм кайгу ваиз. Гуртысьтымы Фаркиниса но Фарвазетдин Кисамовъёслэн сюлмазы но со ноку бурмисьтэм яра кельтӥз. Соослэн будэтэм пизы тушмонлы пумит кышкатэк султӥз. Анатолий Кисамовез ми ноку ум вунэтэ. Солэн кышкасьтэм, юрттыны дась, шаерез гажась луэмез сярысь данъяськыса вераломы.
Тамара
САЙФУТДИНОВА,
Ахметово школаысь ды-шетӥсь.
Кушнаренко ёрос.
Читайте нас: