Улон шыпыт мед луоз

Куинетӥ куарусён - Терроризмлы пумит луон нунал. Туэ со шаерамы 16-тӥ ползэ пусйиське. Шаерез террористъёслэсь утён - Национальной антитеррористической комитетлэн валтӥсь ужпумез. Россиын кышкытлыкъёслэсь утиськон понна трос ужъёс нуисько.

Россиын тужгес кышкыт теракт Бесланын луиз. Йыртэмасьёс отысь школаез киултӥзы. Туннэ «Беслан» кылэз кылыса, синвуос быльырско – тодэ лыкто 2004-тӥ арысь куарусён толэзьлэн нырысетӥ нуналъёсыз. Соку тушмонъёслэн ки улазы быризы номырин янгыш луымтэ адямиос. Киултэм школаысь 333 адямиос улэпен ӧз потэ ни. Соос пӧлысь 186-ез – нылпиос. Нош 783 адями сӧсыртэмын вал.

Бесланын луэм теракт пыр потэмъёс со нуналэз ноку уз вунэтэ. Соослэсь тодэ ваёнъёссэс лыдӟыса тодыны луэ, кыӵе секытлыкъёсты соос пыр потӥллям, кыӵе кышкыт суредъёсты асьсэ синъёсынызы адӟиллям. Кылсярысь, «Коммерсантъ» газетлэн спецкорреспондентэз Ольга Алленова со кышкыт учырез аслаз синъёсыныз адӟем. Дас вить ар ортчыса, со «Форпост. Беслан и его заложники» книга поттӥз.

Отын - авторлэн адӟем кышкыт суредъёсыз, заложникъёслэн тодэ-ваёнъёссы.

«…Лена кык шайгуос азьын сылэ. Пиосыз пичи дыръя, со картэныз люкиськем. Пиоссэ утялтыны, пыд йылазы султытыны анаез юрттӥськем. «Нырысетӥ гырлы» празднике Лена мыныны быгатымтэ. Пиосыз ӵужаенызы школае вамыштӥллям. Леналэн анаез но пиосыз пуля улэ шедиллям. Анаез улэп кылем, нош пиосыз бурмытскиллямтэ ни. Лена нокинэн уг вераськы. Солэсь историзэ матысьёсыз мадё. Со нуналлы быдэ шай вылэ лыктэ. Лена уг бӧрды ни, синвуосыз куасьмиллям», - гожтэ автор.

Лидия Урманова терактын куать матысьёссэ ыштэм. О. Алленова гожтэ: «2004-тӥ арын 1-тӥ куарусёнэ школае мынӥллям солэн Алан пиез Наталья кузпалыныз но дас аресъем нылынызы Марияен, Сергей пиез Рита кузпалыныз но сизьым аресъем нылынызы Залинаен, Лариса нылыз 14 аресъем Юля но 12 аресъем Яна нылъёсыныз. Лидиялэн тямыс матысьёсыз йыртэмасьёслэн ки улазы шедиллям: ньыль внукъёсыз, нылыз но Рита кенэз школаысь улэпен потӥллямтэ ни. Шай вылын сылӥсь Лидиялэн пыд азяз – куать шайгу…»

Куинетӥ куарусёнэ терактъёс луэм городъёсын – Бесланын, Волгоградын, Буйнакскын, Москваын, Санк-Петербургын, Первомайскын, Буденновскын, Волгодонскын, Владикавказын – но мукет интыосын буре ваён акциос радъясько. Школаосын но мукет тодон-валан юртъёсын терроризмен нюръяськонлы сӥзем урокъёс ортчо.

Фото: открытый источник.