Шаерамы тушмон выжы уз лэзьы

Арлы быдэ 3-тӥ куарусёнэ Россиын Терроризмен нюръяськон нунал пусйиське. Соку быдэс дунне куректэ. Адямиосты терактын быремъёсты буре ваёнлы сӥзем ужрадъёс огазеяло.

2004-тӥ арын 1-тӥ куарусёнэ террористъёс Бесланысь школаез киултӥзы. Отын 334 адями улонэн люкиськиз, со пӧлысь 186-ез – нылпиос. Со кышкыт учырез тодэ вайыса, 3-тӥ куарусёнэ республикаысь Культурая министерство, БР-ысь калыкъёслэн Эшъяськон юртсы но Акмулла нимо БГПУ аспӧртэм акция радъязы: лымшор вакытэ «Башкортостан» кун концерт зал азьын инме тӧдьы дыдыкъёсты - тупаса улонлэсь но эшъяськонлэсь тодметъёссэ – лэзизы.

Калтасы ёросысь Вылысь Тыхтем гуртысь культура юртын но библиотекаын ужасьёс та нуналэ пиналъёс понна «Мы против террора» познавательной ужрад ортчытӥзы. Нылъёс но пиос террористъёсын сэрен луэм кышкыт учыръёсты тодазы ваизы, тушмонъёсты огинэ кариськыса вормыны луэ шуыса, огмалпанэ вуизы.