Нырысетӥ классэ мынӥсьёсты шумпоттӥзы

Сое ортчытон сярысь сюлмаськизы Роснефтьысь волонтёръёс. Таӵе акциосты соос Тодон-валан нунал но Выль ар праздник азьын радъяло.

- Вылез дышетскон ар кутскон азьын «Башнефть» АНК ПАО «Подарки к школе!» волонтёрской акция ялэ. Ужасьёс коньдон люкало. Волонтёръёс кузьымъёс басьтыны мыно. Ми, волонтёръёс, реабилитация ценръёсын вераськыса тодӥськом, мар соослы тужгес кулэ шуыса, - вера волонтёр огазеяськонлэн кураторез Эльвира Пермякова. – Нырысетӥ сентябрь азьын реабилитация центръёсын йӧнатскись пиналъёслы рюкзакъёс кузьманэз ми ӟеч сямлы пӧрмытӥм ни.

Школае вамыштӥсь пиналъёслэн праздниксы чылкыт омырын ортчиз. Нырысь соос крезьгур улсын разминка лэсьтӥзы, бӧрысь школае мыныны дасьлыксэс возьматӥзы. Мадиськонъёслы пиналъёс валэктонъёс кема ӧз утчалэ. Собере кутскиз ужрадлэн тужгес тунсыко люкетэз – пиналъёс доры «Башнефтьысь» куноос – бобр, лудкеч но гондыр – вуизы, соосын ӵош – волонтёръёс. Пиналъёс соосты шумпотыса, кужмо кичабонъёсын пумитазы.

- Пиналъёс, нырысетӥ куарусёнысен тӥ дышетон дуннее вамыш лэсьтӥськоды. Ми, реабилитация центрын ужасьёс, тӥледлы ваньзэ умойзэ сӥзиськом. Тыршыса дышетске, дорысьёстэс умой оценкаосын шумпоттэ, - вераз реабилитация центрен кивалтӥсь Айгюль Ахметзянова. – Туннэ асьме доры выльысь вуизы волшебникъёс – асьмелэн матысь эшъёсмы. Соос кузьымъёсын лыктӥллям. Бадӟым тау соослы 2012-тӥ арысен милемын луэмзы понна.