Ӟеч мылкыдын лэзем открытка урамез гожтытэк но вуэ

Кыӵе мон нырысь пайми, нош собере шумпотӥ туннэ, куке Пельнянь нунал бере ӵапак 9 нунал ортчыса, дорам тунсыко открытка вуиз. Отын Вукузё кияз курегпузэн пыжем чорыген возьматэмын. Озьы тупаз, открыткаме басьтыку ачим но пельнянь пӧрай но сое сиыны дасяськиськом вал. Тау бадӟым, Удмуртиысь дуно эше. Шумпотӥсько, таӵе сюрпризъёслы луыса, иськемъёс но уг шӧдско ни куспысьтымы. Вераме потэ, берло дыре та кыкетӥез витьымтэ шорысь Удмуртиысь салам луиз. Ульчаез, коркаез гожтытэк но адямилы шумпотон кузьман мылкыд котьмае шонер интые вуттэ.