Сяськаос шумпотто, улыны кужым сёто

Ачиз со Коньга гуртысь, бускель гуртаз быземын. 19 ар талэсь азьвыл Шудекысь Александрен семья кылдытыса, куать арзэ Сашалэн анай-атайёсыныз ӵош улӥзы. Али соос асьсэ понна ӝутэм вӧл-вӧл юртазы уло ни. Валамон ини, сяськаосты яратӥсь кышномуртлэн соос укно дуръёсаз но, кырын но будо. «Педлон будӥсь сяськаосыз яратӥськогес. Коркамес ляб тазалыко пимы понна шунытгес возиськом. Кӧс омыр но пластиковой укноос сяськаослы умой ӧвӧл. Искусственной сяськаос уд возь ук шуыса укно дурын но ма но со будэ, - люкиське Вероника Герасовна. - Нош кырын котьма будэтыны луэ. Умой кидыс гинэ кулэ. Озьы ваньмыз удалтоз но тонэ шумпоттоз».
Кидысъёсты со эскерем интыосысьтызгес басьтыны турттэ. Арлы быдэ профессиональной кидысъёслы – гибридъёслы интернет пыр заказ лэсьтэ. Гибрид – со одӥг поколенилы гинэ чаклам сорт. Будэм гибридлэсь кидысъёссэ мерттыны луэ, но солэсь сыче ик будос уз пӧрмы ни. Таӵе тодон-валан басьтӥ Вероникалэсь. Сяська будэтон но бакча сиёнъёслэн элитной кидысъёссылэсь ӟеч урожай басьтон сярысь со трос тодэ ни. Туэ тани одӥг выжы ческыт пӧсьтурынэз 30 перец сётӥз, удалтӥзы сугонэз, арбузэз, киярез. Адӟе вал тӥ одӥг петуния кидыслэсь макет бадӟым куак пӧрмем. Тунсыкъяськонэзлы кышномурт уг жаля дырзэ но, коньдонзэ но. Ачиз кадь сяська будэтӥсьёсын форумъёсын пукыса, ог-огенызы туспуктэмъёсынызы вошъясько, дышетско, кенешо. Шудекысь кышномуртъёсын но ӵош люкаськыса кидыс, пе, заказать кариськом. Бӧрысь ваемзы понна коньдонзэ шори люко. Озьы дунтэмгес луэ.
«Сяськаос улонысь ужпумъёсты вормыны юртто. Дорын улонэз капчи ӧвӧл», - шуэ со.
Вероника дышетскемезъя – дышетӥсь. Нефтекамск педколледжез йылпумъям. Школаын 9 ар ужам, соос пӧлысь сизьымзэ - Шудек школаын. Бадӟым пиез понна ужысь дугдоно луиз. Костяен эмчиос доры ветлыны, коррекционной школае нуллыны, пичи пизэ Ромаез Янаулэ школае нуллыны егит кышномурт Сашазэ возьмаса уг улы, ачиз машинаен ветлэ.
- Саша кузпалыд пумит ӧвӧл-а сяськаосын сокем выремедлы? - юатэк ӧй чида.
- Кузпалы – чорыгась. Со но олокытчы вуылэ, Белая шуре но мынэмез вань чорыганы. Солы но ужезлэсь ял карыны кулэ. Со мынам тунсыкъяськонам нырзэ уг чуртна, мон – солэназ. Озьы семьяын улыны капчигес, - валэктон сётӥз чебер сяськаос будэтӥсь егит кышномурт.

Туспуктэмъёс Вероника Уразметовалэн Вконтакте бамысьтыз басьтэмын.